ҚР АҚДМ және Түркия Республикасының уәкілетті органдары арасында меморандумдарға қол қойылды

Мемлекет Басшысы Қ.К.Тоқаевтың Түркия Республикасына мемлекеттік сапары шеңберінде ҚР Ақпарат және қоғамдық даму министрлігі мен Түркия Республикасы Президенттік Аппаратының жанындағы коммуникация басқармасымен БАҚ саласындағы ынтымақтастық туралы; және ҚР Ақпарат және қоғамдық даму министрлігі мен Түркия Республикасының Жастар және спорт министрлігі арасындағы жастар саясаты саласындағы өзара түсіністік туралы меморандумдарға қол қойылды.

Қол қойылған меморандумдар шеңберіндегі ынтымақтастық аталған салалардағы өзара іс-қимылды кеңейтуге және дамытуға бағытталатын болады. Аталмыш меморандумдар төмендегідей негізгі бағыттарды қамтиды.

БАҚ саласы бойынша:

- Тараптар өз мемлекеттерінің ұлттық заңнамаларына сәйкес бұқаралық ақпарат құралдарын өндіруді және таратуды жүзеге асыратын өздерінің ұйымдары арқылы дәйекті ақпаратты таратуға жәрдемдесетін болады.

- Тараптар авторлық және сабақтас құқықтар сақталған жағдайда, бұқаралық ақпарат құралдарын өндіруді және таратуды жүзеге асыратын өз ұйымдары арасында телевизиялық және басқа да ақпараттық контентпен алмасуға ықпал ететін болады.

- Тараптар озық тәжірибені зерделеу және біліктілікті арттыру мақсатында БАҚ саласындағы мамандар (журналистер, кинооператорлар және т.б.) арасында тәжірибе алмасуды жүргізетін болады.

- Тараптар медиажаттықтырушыларды даярлау бойынша Тараптардың жетекші білім беру орталықтарымен байланыс орнатуға ықпал ететін болады, т.б.

Жастар саясаты бойынша:

- жастар саясаты саласындағы мемлекеттік органдар мен ұйымдардың мамандарымен және өкілдерімен алмасу;

- екі ел арасындағы достық қарым-қатынастарды нығайту және мәдениетаралық оқытуды дамыту мақсатында жастармен алмасу;

- жастар саясаты саласындағы халықаралық конференцияларға, семинарларға және басқа да іс-шараларға (форумдар, фестивальдар және кездесулер) өзара шақыру және қатысу;

- жастар саясаты саласында құпия емес материалдармен және ақпаратпен алмасу;

- жастармен жұмыс деңгейін арттыруға бағытталған ұзақ және қысқа мерзімді бағдарламалар мен жоспарларды әзірлеуге және іске асыруға бірлесіп қатысу;

- осы өзара түсіністік туралы меморандумның шарттарына сәйкес жастар мекемелері мен ұйымдарын, сондай-ақ олардың жастар саясаты саласында халықаралық деңгейде бірлескен жобаларды іске асыруға қатысуын қолдау;

- халықаралық жастар ынтымақтастығы мәселелерін шешуде өзара жәрдемдесу;

- қоғамда волонтерлік қызметті ілгерілету және танымал ету тетіктерін құру, жастарды волонтерлер қызметіне тарту бойынша қатысушылардың бірлескен ынтымақтастығы (Түркияда оқитын қазақстандық студенттерді Түркия Республикасы Жастар және спорт министрлігінің жас волонтерлер платформасына өтінім беруге және қатысуға ынталандыру (www.gencgonulluler.gov.tr), Қазақстанда оқып жатқан Түркия Республикасының студенттері үшін www.qazvolunteer.kz платформасында осыған ұқсас жұмысты ұйымдастыру);

- арнайы бағдарламаларды әзірлеуде, кездесулерде және хаттармен алмасуда өзара қолдау көрсету, т.б.

• 16.05.2022
• 191