Қонаевта мемлекеттік қызметкерлер марапатталды

Қонаев қаласындағы мәдениет үйінде өткен жиынның шымылдығын Марат Елеусізұлы уақытша қиындықтарға қарамастан қызметтеріне адалдық танытып, біркісідей белсенділік көрсетіп жүрген барша еңбек иелеріне ризашылығын білдіруден бастады.

Сонымен қатар облыс әкімі ҚР Президентінің 2022 жылғы 17 наурыздағы Жарлығымен облыс әкімінің бірінші орынбасары Лаззат Тұрлашов ІІІ дәрежелі «Барыс» орденімен марапатталғанын, өткен жылы барлығы 24 мемлекеттік қызметші мемлекеттік наградаға ие болып, оның ішінде Қарасай, Іле, Жамбыл аудандары әкімдерінің бар екенін тілге тиек етті.

«Ел Президенті жоспарлаған аймақтың әлеуметтік-экономикалық дамуының ауқымды міндеттерін әрқайсымыздың үйлесімді қызметіміз арқылы ғана іске асыруға болады. Бүгінде бұл жұмысты біздің аймақта 2 мыңға жуық мемлекеттік қызметші орындайтын болады.Мемлекеттік басқарушылар оларға ерекше талаптар, олардан ерекше сұраныс бар екенін түсінуі керек», – деді Марат Елеусізұлы.

Салтанатты шарада аймақ басшысы өз істеріне адалдық танытып, жемісті қызмет атқарып жүрген сала мамандарына құрмет көрсетіп, облыс әкімінің орынбасары Батыржан Байжұмановқа, облыс әкімі аппаратының басшысы Төлеген Сарсембаевқа, облыс әкімі аппаратының бөлім басшысы Айдын Темірбаевқа ҚР Президентінің Алғыс хатын табыстады. Сондай-ақ мереке күні Еңбекшіқазақ ауданы Қаратұрық ауылдық округі әкімінің орынбасары Бауыржан Сокуров пен облыс әкімі аппаратының бөлім басшысы Зәуре Құсайынова ҚР Мемлекеттік қызмет істері агенттігінің «Үздік мемлекеттік қызметші» төсбелгісін кеуделеріне тақса, бір қатар мемлекеттік қызметкерге облыс әкімінің Құрмет грамотасы мен Алғыс хаты берілді.

• 23.06.2022
• 221