Өңір басшысы облыс орталығын абаттандыру барысын тексерді

Облыс әкімі жол-жөндеу және құрылыс-монтаждау жұмыстарының барысын тексерді. Ол мердігерлерге Екінші Павлодардағы кәріз жүйесін сапалы әрі мерзімінде аяқтауды тапсырды.

Әбілқайыр Сқақов қаланы аралауды орталық жағалаудағы іс-шараға қатысудан бастады. Мұнда отыз үш спорт түрінен «Ашық жаттығулар күні» өтті. Өңір басшысы жас спортшылармен және олардың тәлімгерлерімен әңгімелесті.

«De Sport» спорт клубының жаттықтырушы-оқытушысы Денис Амелин жан басына қаржыландыру бағдарламасының енгізілгені үшін алғысын білдірді. Оның айтуынша, бұл тұрақты түрде спортпен айналысатын балалардың санын арттыруға мүмкіндік берді. Клубта футбол, дзюдо, көркем және спорттық гимнастика, акробатика, батут спорты бойынша сабақтар өткізіледі.

Усолка шағын ауданындағы жағалауда абаттандыру жұмыстары жүріп жатыр. Жаңа жағалаудың жалпы ұзындығы 800 метрді құрайды. Мұнда балаларға арналған ойын алаңдары, жаяу жүргіншілер аймағы, шахмат үстелдері мен орындықтар орнатылады. Жағалаудың периметрі бойынша бейнекамералар орнатылып, ағаш көшеттері отырғызылады. Болашақта  Усолка жағалауын Ертіс жағалауының негізгі бөлігімен қосу жоспарлануда. Ол үшін шаңғы роллер трассасы маңында жаяу жүргіншілер көпірін салу қажет.

- Жағалаудың оңтүстік және солтүстік бөліктерін қосу керек, - деді облыс әкімі. - Тұрғындарға белсенді демалыс пен жаяу серуендеуге тарту қажет. 

Өңір басшысы Павлодардағы орталықтандырылған кәріз желілерінің құрылыс барысымен танысты. Желілердің жалпы ұзындығы шамамен тоғыз шақырымды құрайды. Бүгінгі таңда мердігер ұйым сегіз көшедегі жұмыстарды аяқтады. Барлығы он алты көшеде кәріз құбырлары тартылады.

Әбілқайыр Сқақов жергілікті тұрғындармен кездесіп, шағын ауданды абаттандыру жоспарларымен бөлісті. Қала тұрғындары үйлерді жылу және сумен жабдықтау желісіне қосу, жер асты суларының көтерілуі бойынша сұрақтар қойды.

- Кәріз желілерін тарту жер асты суларының проблемасын шешуге мүмкіндік береді, - деді әкім. - Кәріз жүйесін іске қосқаннан кейін біз жер асты суларының мәселесінің нақты көрінісін байқаймыз. 

Сондай-ақ, аймақ басшысы қала көшелерін асфальттау барысын тексерді. Өткен жылы Екінші Павлодардағы  тоғыз көшеге асфальт төселді. 2024 жылға қарай мұнда барлық көшелерді асфальттау жоспарлануда.  

Биыл Павлодарда жалпы ұзындығы 25 шақырымнан асатын он екі көшені жөндеу жоспарланған. Олардың қатарында Ломов, ак. Бектұров, ак. Сәтбаев, Нұрмағамбетов  көшелері бар. Өңір басшысы алдағы уақытта жол құрылысымен қатар тротуарларды құру мен жасыл желектерді отырғызуды қарастыруды тапсырды.

• 05.07.2022
• 282