Әбілқайыр Сқақов облыс әкімдігінің Іс-қимыл бағдарламасының жүзеге асырылуы туралы есеп берді

Өңірде 6 мыңға жуық тұрғын уақытша және тұрақты жұмыс орындарына орналастырылса, қиын өмірлік жағдайға тап болған 55 отбасыға құжаттар мен жәрдемақыларын рәсімдеуге көмек көрсетілді, сондай-ақ, 19 оқу мекемесінің жанынан жұмыссыз жастарға қолдау көрсететін өзекті мамандықтар орталықтары құрылды. Павлодар облысының әкімі Әбілқайыр Сқақов осы және басқа да жұмыстар туралы ОКҚ-де есеп берді.

Елордадағы баспасөз конференциясында аймақ басшысы жаңа іс-қимыл бағдарламасы қалай құрылғанын айтып берді. Еске сала кетейік, оны құрастыруға облыс тұрғындары қатысып, 2,5 мыңға жуық ұсыныстар жіберді және екі стратегиялық сессияда жоспардың бағыттарын талқылады.

- Сессиялардың жұмысына 5-қаңтар күні алаңға шыққандар да қатысты. Жалпы талқылаудың нәтижесінде 2022 жылға арналған Іс-қимыл бағдарламасы құрылды. Бағдарлама бойынша нақты мақсаттарға құрылған нақты проблемаларды шешуге бағытталған 5 мың жұмыссыз жасты еңбекпен қамту, 12 мың оқушының белсенді демалысын ұйымдастыру және т.б. нақты іс-шаралар бар, - деп бөлісті Әбілқайыр Сқақов. - Жаңа бағдарлама іске қосылғаннан кейін Павлодар облысының 6 мыңға жуық тұрғыны тұрақты және уақытша жұмысқа орналастырылды.

Облыс әкімі едәуір нәтижеге қол жеткізуге мүмкіндік беретін үш жаңа көзқарасты атап өтті. Біріншіден, бұл жұмыспен қамту орталықтарының жұмысының қағидаттарын өзгертуге байланысты. Қазір орталықтардың қызметкерлері кәсіпорындардың HR-қызметтерімен тығыз байланыс орнатып, шалғай ауылдарға шығып, адамдар көп шоғырланатын орындарға барады. Яғни, мобильді жұмыспен қамту орталықтары пайда болды. Екіншіден, 19 білім беру мекемелерінің жанынан өзекті мамандықтар орталықтары ашылды. Мұнда жұмыссыз жастар кеңес алып, оларға құжаттарды рәсімдеу, жұмысқа орналасу немесе тағылымдамадан өту бойынша көмек көрсетіледі.

- Үшіншіден, біз қиын өмірлік жағдайға тап болған отбасыларды анықтаумен айналыса бастадық, - деп жалғастырды аймақ басшысы. - қазір біз Еңбек министрлігі енгізіп жатқан «Отбасының цифрлық картасы» бойынша белсенді жұмыс істеп жатырмыз. Қазіргі кезге дейін 55 отбасыға құжаттар мен жәрдемақылар рәсімдеу бойынша, 12 отбасыға психологиялық көмек көрсетіліп, осы отбасылардың 39 адамы жұмысқа орналастырылды.

Еске сала кетейік, бағдарламада 10 бағыт пен 97 іс-шара бар. Сонымен бірге, Әбілқайыр Сқақов Президенттің жарлығы бойынша жаңа форматта өтіп жатқан тұрғындармен кездесулердің аралық нәтижелері туралы айтып берді. Қазіргі кезде облыс басшылығы 100-ге жуық ауылды аралап, тұрғындар кездесулерде 536 мәселе көтерді. Олардың 40%-ға жуығы шешімін тапты.

Әкім қабылданатын шешімдер адамдарға бағытталуы тиіс екенін атап өтті. Тұлғаға бағытталған жұмыс қағидаты алғашқы медициналық-санитариялық қызмет пен балалық шақты қорғау шараларының негізінде жатыр.

 
- Қазіргі кезде емханаға қоңырау шалу уақыты 4 есе қысқарды, мейірбикелер мен цифрлық бекеттерді енгізу есебінен дәрігерлердің жүктемесі 35%-ға азайды, call-орталықтар мен тіркеу бөлімдерінің 385 қызметкері оқытудан өтті. Бұл тек аралық нәтижелер ғана, - деп хабарлады Әбілқайыр Сқақов емханалардың жұмысын өзгерту туралы.

Балалық шақты қорғау бойынша әкім әлеуметтік қолдау, ерекше қажеттіліктері бар балаларды оңалту, балалар спортын дамыту және жас таланттарды қолдау сияқты төрт негізгі бағытты атап өтті.

- Бала бақшалар мен мектептердегі ыстық тамақпен қаржыландыру көлемін 1,8 есеге, яғни, 4 миллиардқа дейін ұлғайттық. Қазір облыстағы оқушылардың жартысынан көбі осы қолдау шарасымен қамтылды. Ал, 1-мамырдан бастап, облыстың үш қаласындағы барлық мектеп оқушылары қоғамдық көлікте тегін жүреді, - деп хабарлады облыс әкімі.

Ол балаларды оңалту инфрақұрылымын кеңейту жоспарлары, 7 ірі спорт нысандарының, 13 шағын футбол алаңының және 63 спорт алаңдарының құрылысы туралы хабарлады.

• 05.07.2022
• 251