Құрметті облыс тұрғындары! Қадірменді халайық!

Сіздерді әлем мұсылмандарының аса ұлық мейрамы, барша  қауымының қасиетті күні – Құрбан айт мерекесімен шын жүректен құттықтаймын!

Құрбан айт – бейбітшілік пен бірлік, мейірімділік пен бауырмалдық сынды мәңгілік адами құндылықтарды паш ететін, оң пейілге, ізгі ниетке бастайтын мерейлі  мереке.

Еліміздің бүгінін бекемдеп, болашағын айқындайтын Жаңа Қазақстан құру кезеңінде Құрбан айттың қазақстандықтардың рухани өміріндегі, қоғамның ауызбіршілігін бекемдеудегі маңыздылығын айтып жату артық болар.  Мейрам күндері көпшілік Құрбан шалып, бір-біріне қамқорлық көрсетіп, мұқтаж жандарға қолдау танытып, ізгі амалдар жасауға асығу арқылы еліміздің береке-бірлігін арттыра түсері анық. 

Ғасырлар қойнауынан тамыр тартқан қасиетті мейрамның мәні ғибратқа  толы. Жыл өткен сайын халық рухани құндылықтардың қадір-қасиетін терең ұғына бастады. Қоғамда толеранттылық, конфессия өкілдері арасындағы өзара түсіністік бекемделе түсуде. Өйткені бір-біріне қамқор болу, жылылық таныту, көмек ету – мұның бәрі күллі адамзатқа тән гуманистік ойлармен үндесіп жатыр.

Биыл Мемлекет басшысының пәрменімен Алматы облысының орталығы Қонаев қаласының тұрғындары да осы мерекені ыстық ықыласпен қарсы алуда.

 Алдағы уақытта да татулық пен тыныштықты бағалай отырып, халықтың салт-дәстүрі мен діни сенімдеріне өзара сыйластықпен қарау арқылы өңіріміз  одан әрі гүлдене береді деген сенімдемін.

Осы қасиетті күнде шалған құрбандарыңыз, жасаған дұғаларыңыз қабыл болып, арман-тілектеріңіз орындалсын. Атқарған әрбір ізгі амалдарыңыздың сауабы мол болсын! Әрбір шаңырақ қуаныш пен жақсылыққа кенеліп, еліміздің тыныштығы, бақ-ырысы арта берсін!

Баршаңызға зор денсаулық, еңбекте табыс, бейбіт те берекелі ғұмыр тілеймін.

Құрбан айт қабыл болсын!

• 08.07.2022
• 352