Ұлттық ұлан факультетіне – 10 жыл!

17-қараша күні Қазақстан Республикасының Тұңғыш Президенті – Елбасы атындағы Ұлттық қорғаныс университетінде «Ұлттық ұланның заманауи жағдайдағы жедел өнері мен тактикасын дамытудың өзекті мәселелері» тақырыбында дәстүрлі Халықаралық ғылыми-теориялық конференция өтті.

Іс-шара Ұлттық ұлан факультетінің 10 жылдық мерейтойына орай ұйымдастырылды. Үкімет Қаулысымен факультет 2010 жылдың 17-қарашасында агылған болатын.

Конференция барысында Ұлттық қорғаныс университеті факультеттері мен кафедраларының профессорлық-оқытушылық құрамы, Ұлттық ұлан Бас қолбасшылығы мен Әскери институт офицерлері баяндамалар жасап, өзекті мәселелерді талқылады.

Факультетті мерейтойымен Ұлттық ұлан Бас қолбасшысы генерал-лейтенант Руслан Жақсылықов құттықтап, оның құқықтық тәртіп әскері үшін жедел-тактикалық деңгейдегі офицерлерді даярлаудағы маңыздылығын атап өтті.

Ұлттық қорғаныс университетінің бастығы генерал-лейтенант Сұлтан Камалетдинов құқықтық тәртіп әскерінің факультеті университеттегі жетекші факультеттердің бірі екенін және оның оқытушылық құрамы әскерге кадрлар даярлау бойынша өз міндеттерін адал орындайтынын, сондай-ақ әскери ғылымның дамуына елеулі үлес қосып отырғанын атап өтті.

Мерейтой барысында факультет офицерлерінің жетістіктері мен табыстары еленіп, Ұлттық ұлан Бас қолбасшысының және Ұлттық қорғаныс университеті бастығының бұйрықтарымен бірқатара әскерилер марапатталды. Ұлттық ұланға жедел-тактикалық деңгейдегі жоғары квалификациялық кадрлар даярлауға қосқан үлесі үшін және факультеттің құрылғанына 10 жыл толуына орай 7 офицер грамотамен, 2 офицер І, ІІ дәрежелі «Ұлттық ұлан қызметінің үздігі» кеуде белгісімен марапатталды.

Ұлттық ұлан факультетінің бастығы, әскери ғылымдардың докторы, профессор, генерал-майор Жұмабек Ахметов 60-қа жуық баяндаманы қамтыған коференция турасында қысқаша айтып өтті. Ұлттық ұлан жедел өнері мен тактикасын зерттеу жолдары, әскердің жауынгерлік қызметін заманауи жағдайда қамтамасыз ету мәселелері, әскери қызметшілердің дайындығын арттырудың перспективалары мен тенденциясы жайлы сөз қозғалды.

Он жыл ішінде Ұлттық ұлан факультеті 125 магистрантты дайындап шығарды. Факультет түлектері Ұлттық ұланның барлық өңірлердегі әскери бөліністерінде жауапты лауазымдарда қызмет етуде. Сонымен қатар 302 офицер факультетте кәсіби біліктілігін шыңдады.

• 20.11.2020
• 435