ҚР Премьер-Министрі Павлодар облысы диқандарының жобаларын жан-жаққа таратуды ұсынды

Павлодар облысына жасаған жұмыс сапары кезінде ҚР Үкімет басшысы Әлихан Смайылов «AgroTrade PV» ЖШС шаруа қожалығында болып ауыл шаруашылығы тауар өндірушілермен ауыл шаруашылығы техникасын сатып алу және мал шаруашылығын субсидиялау мәселелерін талқылады. Әлихан Смайылов жергілікті диқандардың заманауи суару технологияларын жан-жаққа тарату керектігін атап өтті.

Мемлекет тарапынан қолдауға ие болған «AgroTrade PV» ЖШС ауыл шаруашылығы саласында әртүрлі жобаларды сәтті жүзеге асыруда. Кәсіпорын заманауи суару технологиялары арқылы 1700 га алқапта картоп өсіреді. Ертіс өзенінің жоғары потенциалы арқылы шаруа қожалығының суармалы алқаптарды көбейтіп, ауыл шаруашылығына қажетті жерді кеңейтуге мүмкіндік бар.

Ферма аумағында қуаттылығы 10 мың тонна көкөніс сақтау қоймасы салынған. Қажетті температуралық режимді сақтау үшін қоймада голландиялық технология бойынша автоматтандырылған вентиляциялық қондырғы орнатылған. Энергия және су баламалы көздерін пайдалану бойынша арнайы құрал-жабдықтарды орнату жоспарлануда. Алдағы уақытта жылына 10 мың тонна сүт өндіретін тауарлы-сүт фермасын салу көзделуде.

Шаруа қожалығының жұмысымен танысқан ҚР Үкімет басшысы Әлихан Смайылов осындай жобаларды басқа да өңірлерде жүзеге асыру қажеттілігін атап өтті.

«Қазіргі кезде бүкіл әлемде азық-түлік қауіпсіздігі мен бағаларының өсуі болып жатқан кезде заманауи суды тиімді пайдаланатын ауыл шаруашылығы жобаларына ден қоюымыз қажет. Меніңше, мұндай жобаларды басқа да өңірлерге тарату керек. Мемлекеттің қолдауы арқылы зор әлеуметтік және экономикалық нәтижеге қол жеткізетініміз анық», - деді Премьер-Министр.

Сонымен бірге, Үкімет басшысы Әлихан Смайылов өңірлік ауыл шаруашылығы құрылымдарының басшыларымен кездесіп, тұқым өсіру, ауыл шаруашылығы техникасы мен минералды тыңайтқыштарды сатып алу, мал шаруашылығы мен құс өсіруді дамытуды субсидиялау мәселелерін талқылады.

• 22.08.2022
• 214