Облыстың білім беру қызметкерлерінің тамыз конференциясына қатыстым

Мемлекет Басшысы Қасым-Жомарт Кемелұлы Тоқаев: «Біз әрқашан қазіргі заманның жаңа талаптарына сай болуымыз керек. Сіздердің бүгінгі оқушыларыңыз-Қазақстанның жарқын болашағы» деген болатын.
Биыл облыстың білім беру саласының бюджеті 149 млрд.теңгені құрайды.
Бүгінгі таңда өңірдің 782 білім беру ұйымында 166 мыңға жуық бала оқиды және 36 мыңнан астам адам жұмыс істейді.
Жергілікті жерлерде сапалы білім беру ортасын құру үшін барлық қажетті шаралар қабылдануда.
Өңірде инфрақұрылымдық мәселелер қарқынды шешілуде, жаңа оқу жылында Қарабалық ауданында 320 орындық мемлекеттік тілде оқытатын мектеп пайдалануға беріледі, сондай-ақ Қостанай қаласында «Береке», «Қонай» шағын аудандарында тағы 2 мектеп салынуда. Жалпы, 2025 жылға дейін облыста 9 120 орындық 14 жаңа мектеп ашылады.
Оқу мен тәрбиеге қолайлы жағдай жасау үшін жыл сайын күрделі және ағымдағы жөндеу жұмыстары жүргізіледі. Атап айтқанда, биыл 108 білім беру нысанын жөндеуге 7 млрд.теңге бөлінді.
Айта кету керек, жекеменшік мектептер жүйесі де кеңеюде. Жыл соңына дейін Қостанай қаласында пәндік олимпиадаларға дайындалуға бағдарланған қазақ тілін тереңдетіп оқытатын «QAZBILIM» лицейі және KAZGUU SCHOOL ағылшын тілін тереңдетіп оқытатын кәсіпкерлік мектебі ашылады. Яғни, білім берудің қолжетімділігін қамтамасыз ету бойынша мемлекет пен бизнес тарапынан нақты шаралар қабылдануда.
Конференция соңында облыстың білім беру жүйесін дамытуға үлкен үлес қосқан педагогтарды Құрмет грамоталарымен, төс белгілерімен марапаттадым.

• 23.08.2022
• 319