Үкіметтік емес сектор өкілдерімен кездесу

ҚР Ақпарат және қоғамдық даму министрі А.Омаров Азаматтық бастамаларды қолдау орталығында үкіметтік емес ұйым өкілдерімен кездесті.

Кездесуге қатысушылар ҮЕҰ-ны грант арқылы қаржыландыру, волонтерлік қызмет, қайырымдылық, мемлекеттік әлеуметтік тапсырыс саласындағы заңнамаға өзгерістер енгізуге қатысты жұмыстар, сондай-ақ, ҚР Ақпарат және қоғамдық даму министрлігі қаржыландыратын гранттық жобаларды іске асыру барысын талқылады.

«Министрлік қызметінің басты бағыттарының бірі – мемлекет пен азаматтық қоғамның өзара ынтымақтастығының тиімді моделін құру. Осы ретте мемлекет үкіметтік емес секторды мықты серіктес деп біледі.

Азаматтық бастамаларды қолдау орталығы арқылы берілетін гранттар үкіметтік емес ұйымдар үшін қоғамның әлеуметтік мәселелерін шешуде, азаматтық бастамаларды қалыптастыруда үлкен қолдау», - деді Асқар Омаров.

ҚР АҚДМ Азаматтық қоғам істері комитетінің төрағасы Мадияр Қожахмет шара аясында үкіметтік емес ұйымдарды мемлекеттік қолдау саласындағы заңнаманы жетілдіру бағытындағы жұмыстардың барысы туралы айтып берді.

Азаматтық бастамаларды қолдау орталығының Басқарма төрағасы Ғалым Құрманның айтуынша, биыл 102 жобаның 58-ін ҚР Ақпарат және қоғамдық даму министрлігі, 27 жобаны Маңғыстау, Атырау, Қарағанды, Қостанай облыстарының жергілікті атқарушы органдары және 15 жобаны «Шелл Қазақстан» компаниясы қаржыландырады.

Сондай-ақ іс-шара аясында үкіметтік емес ұйым өкілдері өздерінің іске асырып жатқан жобалары туралы баяндама жасап, гранттық қаржыландыру саласындағы өзекті мәселелерді қозғады.

• 31.08.2022
• 294