Павлодар облысында алғашқы БМСК орталығы ашылды

Заманауи медициналық көмек 20 мың павлодарлық тұрғын үшін қолжетімді болды. Тұрғындарға ауруларды анықтаудан бастап, күндізгі стационарда ем қабылдауға дейінгі әртүрлі медициналық көмек көрсетіледі. Әбілқайыр Сқақов өңірдегі алғашқы БМСК орталығының жұмысымен танысты.

Жаңа БМСК орталығы бір ауысымда 150 адамды қабылдай алады. «Almaz Medical Group» ЖШС филиалының бас дәрігері Қуаныш Нысанбековтың сөзіне қарағанда, медициналық мекеменің ашылуы тұрғындарға үй маңында сапалы әрі жедел қызмет көрсетуге жол ашады.

- Ұйым ең жаңа құрал-жабдықтармен қамтылған. Тұрғындар үйлерінен алысқа бармай-ақ заманауи медициналық көмек ала алады. Әсіресе, бұған емханаға баруға қиналатын қарттар қуанышты, - деді бас дәрігер.

Орталықты аралаған Әбілқайыр Сқақов медициналық қызмет көрсетулер қолжетімділігінің мен БМСК сапасының артуы өңірдегі жалпы денсаулық сақтау саласындағы басым бағытқа айналуы тиіс екендігін атап өтті.

- Аталған орталық облыстағы басқа емханаларға үлгіге айналуы керек. Мұнда барлық жағдай жасалған: қолжетімді медқызметтер мен сапалы сервис. Бастысы, көмектің барлығы үйдің маңында көрсетіледі, - деп атап өтті облыс әкімі.

Күндізгі стационар терапия мен гинекология профильдері бойынша 12 төсек-орыннан тұрады. Орталықта 26 білікті маман, оның ішінде 11 дәрігер жұмыс істейді. Бүгінде емханаға 13 мың адам тіркелген. Олардың саны 20 мыңға жетеді деп күтілуде.

Павлодар облысы әкімінің баспасөз қызметі
Суреттерді түсірген Валерий Бугаев

• 08.09.2022
• 286