Павлодар облысының әкімі Майқайың тұрғындарын ауылдың 90 жылдығымен құттықтады

Бүгін Баянауыл ауданы Майқайың кентінің 90 жылдық мерейтойы салтанатты түрде аталып өтті. Әбілқайыр Сқақов мерейтойға орай кенттің құрметті тұрғындарын марапаттады.

Салтанатты іс-шараны Әбілқайыр Сқақов ашып, майқайыңдықтардың облыс дамуына қосқан үлесін ерекше атап өтті.

- Майқайың кенті бір аудан ғана емес, өңіріміздің дамуында ерекше орны бар елді мекен, - деп атап өтті облыс әкімі. – Биыл Майқайың кентінің 90 жылдығы атап өтілуде. Алайда оның тарихы ХІХ ғасырда басталғанын білеміз. Соғыс жылдарында елді мекеннің елге елеулі үлес қосты. Ал бейбіт кезде мыңдаған тонна алтын халқымыздың әл-ауқатын, маңызды әлеуметтік жобаларды жүзеге асыруға зор септігін тигізді.

Облыстың дамуына қосқан үлестері үшін Әбілқайыр Сқақов ауылдың құрметті азаматтарын марапаттады. Олардың ішінде дәл осы күні 90 жасқа келген Мұхтар Әбенов те болды. Одан басқа майқайыңдықтардың бірқатары өңір басшысының Құрмет грамоталары мен Алғыс хаттарын иемденді.

Мерекелік бағдарламаны Баянауыл ауданының өнер ұжымдары мен жергілікті өнерпаздар жалғастырды. Ж. Аймауытов атындағы облыстық қазақ музыкалы-драма театрының әртістері көрермен қауым назарына Майқайың кентінің іргесі қаланған тарихынан сыр шертетін театрландырылған көрсетілімін ұсынды. Мерейтой құрметіне кент маңында бәйге және басқа да ұлттық ат спортынан жарыс ұйымдастырылды. Ат жарыстарының жүлдегерлері бағалы сыйлықтардың иегерлері атанды.

• 10.09.2022
• 338