Май ауданында әлеуметтік инфрақұрылым кезең-кезеңімен жаңартылуда

Кеңтүбек ауылында жергілікті мектеп пен балалар және жасөспірімдер спорт мектебі жаңартылды. Облыс әкімі Әбілқайыр Сқақов Май ауданының әлеуметтік-экономикалық дамуымен танысты.

Өткен жылы Жалтыр жалпы орта білім беру мектебі күрделі жөндеуден өтті. Мектеп директоры Анар Жанығұлова айтып өткендей, 1983 жылы салынған ғимарат толығымен жаңғыртылды. Мектеп шатыры, әйнектері, есіктері ауыстырылып, электр желілері, жылу жүйесі жаңартылып, ішкі әрлеу жұмыстары өткізілді.

Облыс әкімі мектептің жаңа жылыту маусымына әзірлігін тексеріп, балалардың жайлы жағдайда білім алуы үшін аталмыш нысанды үзіліссіз жылумен қамтуды мықтап қолға алу туралы тапсырма берді.

Балалар өңір басшысына сұранысқа ие мамандықтарды меңгергісі келетіндерін әңгімелеп берді. Өңірімізде іске қосылған «Жаңа мамандықтар атласы» жобасының аясында оқушылар мамандық таңдауға көмектесетін тестілеуден өтіп, әрбіреуінің психологиялық портреті жасалынды. Облыс әкімі бұл іске мектеп түлектерін тартуға шақырды. Олар өз өмірбаянын балаларға әңгімелеу арқылы оқушылардың болашақта өз орнын табуға көмек бере алады.

Кеңтүбектегі аудандық балалар және жасөспірімдер спорт мектебінің филиалында шатыр, әйнектер, есіктер, еден ауыстырылып, жылу жүйесі ретке келтірілді. Спорт мектебінде 90-ға жуық бала еркін күрес, тоғызқұмалақ және волейболмен айналысады. Биылдан бастап мұнда үстел теннисінен секция ашылды.

Әбілқайыр Сқақов мектептерде үстел теннисін дамытудың маңыздылығын кезекті рет атап өтті.

- Бұл маңызды әрі әлеуметтік спорт түрін барынша насихаттау керек, - деді облыс әкімі. – Осыған дейін де өңірімізде балаларды тәртіпке баулып, балғын спортшылардың ой-өрісін кеңейтетіп, көру қабілетін жетілдіретін үстел теннисін дамыту бойынша тапсырма берген болатынмын.

Өңір басшысы облыстық және республикалық жарыстарда жүлделі орындардан көрініп жүрген оқу орнының түлектерімен кездесі, алдағы жарыстарда жеңістер тіледі.

• 15.09.2022
• 315