Марат Сұлтанғазиев: «халықаралық туризм- алтын жұмыртқа салатын тауыққа айналды»

Өткен жылы Ұйғыр ауданының табиғатына тамсанып келген туристер саны 116 мың адамды құрады, оларға көрсетілген қызметтің көлемі 538 млн теңгеге жетті. Бұл 2020 жылмен салыстырғанда 413,6 миллион теңгеге артық екенін көрсетті. Яғни, туристерге көрсетілген қызмет көлемі 30%-ға өсті деген сөз. Бұл туралы Алматы облысының әкім і Марат Сұлтанғазиев Ұйғыр ауданының халқымен кездесуі кезінде мәлімдеді.
Жалпы ауданда келуші жұрттың көзі қызығатын жерлер өте көп. Мәселен, 2020-2021 жылдары жалпы құны бір миллиард теңгеге жуық инвестицияға «Дария», «Комфорт», «Жемчужина» және басқа да термалды бұлақтарда демалыс орындары пайдалануға берілді. Бұдан бөлек, Назугум үңгірлері, Ағаш көліде туристер үшін аса көркем мекен екені жасырын емес.
«Шарын локациясында туристік кластерді дамыту «Шарын» мемлекеттік ұлттық табиғи паркінің әлеуетіне негізделген, реликті күл тоғайы, Шарын өзенінің каньоны, термалды бұлақтар, бұл облыс аумағында туристерді қызықтыратын көркем жерлер»-деді Марат Елеусізұлы.
Облыс әкімі, түрлі туристік ресурстардың болуын былай қойғанда, өңірдегі қолайлы климаттық жағдайлар туристерді қыста да, жазда да қабылдауға мүмкіндік беретінін тілге тиек етті.
Оның айтуынша, халықаралық туризм «алтын жұмыртқа салатын тауыққа» айналған.
Қазіргі уақытта Ұйғыр ауданының аумағында 170 жылу ұңғымалары мен 55 орналастыру орындары бар. Бүгінгі күні, экология, геология және табиғи ресурстар министрлігімен бірлесіп «Шарын» ұлттық саябағына «Qazaq Geoqraphy» зәкір инвесторы тартылды, ол экотуризмді дамыту бойынша 5 миллиард теңгеден астам сомаға инвестициялық жобаны жүзеге асыруды жоспарлап отыр.
Осыған байланысты өңір басшысы жиын соңында, өзінің орынбасары Арслан Дандыбаевқа, Мемлекеттік кірістер департаментіне, туризм, энергетика және тұрғын үй-коммуналдық шаруашылық, жолаушылар көлігі және автомобиль жолдары басқармаларына аудан әкімімен бірлесе отырып, туризмді дамыту мәселелерін, құрылыс және реконструкциялау бойынша жоспарланған нысандарды уақытында аяқтауды ерекше бақылауға алып, туризмнен түсетін салық түсімдерінің дұрыс есебін жүргізуді тапсырды.

• 13.10.2022
• 248