Павлодар облысында «Исабек Ишан Хазрет» мазар кешенінің маңында заманауи қонақ үй ашылды

Мазар кешенінің маңындағы демалыс үйі 24 адамды қабылдай алады. Әбілқайыр Сқақов ашылу салтанатына қатысты.

Павлодар облысының киелі картасына 43 нысан енген. Осы тізімдегі ең маңыздыларының бірі – мыңдаған турист пен зиярат етушілерді тартатын Екібастұз ауылдық аймағында орналасқан Исабек Ишан Хазрет мазар кешені.

Келушілердің ыңғайлы орналасуы үшін мазар кешенінің қасында 24 орындық заманауи қонақ үй салынды. «Исабек Ишан Хазрет» қорының қамқоршылық кеңесінің мүшесі Маңат Алғамбаров айтып өткендей, бірқабатты ғимаратта 8 нөмір және ағартушының қолжазбалары қойылған музей бар. Жоба демеушілер қаражаты есебінен жүзеге асырылды.

Ашылу салтанатына өңір басшысы Әбілқайыр Сқақов қатысып, мәдени мұра сақталуы мен киелі мекендердегі туризмнің дамуы маңыздылығын атап өтті.

–  Исабек ишан халқымыздың руханиятына ерекше үлес қосқан тұлға. Әрбіреуіміз бабамыздың есімін жадында сақтаған, - деді облыс әкімі. – Бүгін біз игілікті іс – зиярат етушілерге арналған жаңа демалыс орнының ашылуының куәсі атандық. Бұл іске қатысы бар адамдардың баршасына алғыс айтамын.

Исабек ишан Хазрет – халық арасында аса қадірлі діни, рухани қайраткер, философ, ағартушы әрі Мәшһүр Жүсіп ұстазы. Хазрет мазар кешені Қылдыкөл маңында Екібастұз ауылдық аймағының Ақкөл ауылдық округы Ақкөл ауылынан 18 шақырым жерде орналасқан. Киелі орында екі мазар, мешіт, зиярат етушілерге арналған үй және қасиетті сулы құдық бар. Іс-шара соңында Исабек ишан Хазрет рухына арналған ас берілді.

• 18.10.2022
• 300