Республика күні қарсаңында «Тәуелсіздік ұрпақтары» жастар премиясының лауреаттары марапатталды

Әбілқайыр Сқақов «Тәуелсіздік ұрпақтары» облыстық жастар премиясының жеңімпаздарын марапаттады. Олардың арасында халықаралық жарыстар жеңімпаздары, ғылым, өнер және спорт саласындағы таланттар бар.
 
«Тәуелсіздік ұрпақтары» жүлдесі кәсіби, ғылыми, шығармашылық және қоғамдық салада табысқа ие болған дарынды жастарға беріледі. Бүгін ұлттық мереке – Республика күні қарсаңында өңір басшысы жеңімпаздарды құттықтап, болашақ өркендеген Қазақстанның іргетасы жастар екендігін тағы бір мәрте қадап айтты.
 
— Әрбіреуіңіз әртүрлі салада зор жетістікке қол жеткізді. Сіздер бір орында тұрмай, өздеріңіз де, өзгені де жетілдіруге атсалысып жатырсыздар. Осының бәрі сіздердің көшбасшылық қабілеттеріңіздің белгісі, - деді облыс әкімі. – Табандылық, адалдық және еңбекқорлық қасиеттеріңізді жоғалтпайтыныңызға сенімдімін. Өйткені, сіздер сияқты лидерлермен ғана әділетті әрі дамыған Қазақстанды құра аламыз.
 
Биыл білікті қазылар алқасы конкурсқа жолданған 100 өтініш арасынан «Тәуелсіздік ұрпақтары» жастар премиясының 10 номинациясы бойынша 20 жеңімпазды анықтады. Олардың қатарында «World Skills Competition – 2022» бүкіләлемдік конкурсының жүлдегері, Торайғыров университетінің студенті Дина Афанасьева да бар.
 
— Еліміз үшін тарихи маңызға ие күн қарсаңында жүлде алу мен үшін зор табыс. Қолдау көрсеткен баршаңызға рахмет. Жетістіктерімді бағалағандарыңыз үшін алғыс айтамын,  – деді конкурс жүлдегері.
 
Сонымен бірге акробатикадан Азия чемпиондары, әлем чемпионатының күміс жүлдегерлері Анатолий Пахандрин мен Санжар Садуов және IV Бүкілресейлік «Medical Soft Skills» чемпионатының дипломанты Темирхан Баяхметов та премияға ие болды. Екі баланы құтқарған Ертіс аудандық полиция бөлімінің кезекші көмекшісі Азамат Саянов «Ерлігі үшін» номинацисында жеңімпаз атанды. Өскелең ұрпақ өкілдерінің тағы бірқатары «Ауыл шаруашылық жұмыскері», «Қоғамдық қызмет», «Спорт», «Медицина», «Өндіріс жұмыскері», «Кәсіпкерлік», «Волонтерлік» және «Мәдениет» салаларында үздік шықты. Лауреаттың әрбіреуіне ақшалай сертификат табысталды. Жалпы жүлде қоры – 10 миллион теңге. Салтанатты рәсім мерекелік концертке ұласты.

• 22.10.2022
• 253