Республика күніне орай Павлодар облысының 83 тұрғыны мемлекеттік наградаларға ие болды

Ұлттық мейрам қарсаңында бірқатар павлодарлықтар елдің дамуы мен қоғамдық өмірдегі белсенділігі үшін жоғары мемлекеттік марапаттарға ие болды. Павлодар облысының әкімі Мемлекет басшысы атынан ордендер мен медальдарды табыс етті.

Салтанатты рәсімді ашқан Әбілқайыр Сқақов жиылғандарды тәуелсіз Қазақстан үшін тарихи күнмен құттықтады.  

–  32 жыл бұрын бұл күні жаңа республика - егеменді Қазақстан дүниеге келді. Дала қыранына тән мінезбен еліміз тәуелсіздік жолына мемлекет басына түскен алғашқы жылдардағы қиындықтарды жеңе білді, - деді өңір басшысы. –  Бүгінде Қазақстан жаңа жолды бастамақ. Бұл тарихи оқиға дәл осы күнге, 25 қазанмен тұспа-тұс келгені кездейсоқтық емес. Биыл бұл мерекеге ұлттық мейрам мәртебесі қайтарылды. Мереке құтты болсын!

Облыс әкімі Қазақстан халқына тән әділдік, теңдік және бірлік секілді асыл қасиеттерді санамалап өтті. Әбілқайыр Сқақов атап өткендей, осының бәрі күнделікті еңбегімен ел дамуына өлшеусіз үлес қосып жатқан азаматтарымыздың жетістіктеріне тікелей байланысты.  

–  Осы қағидалар Мемлекет басшысы мұрындық болған өзгерістердің негізіне айналды. 10 ай ішінде біз түбегейлі экономикалық және саяси реформалардың жүзеге асырыла бастағанының куәсі атандық, ал санаулы күндерден соң қазақстандықтар президент сайлауында дауыс беретін болады, – деді Әбілқайыр Сқақов. – Ел тарихындағы осынау өзгерістер биылғы Республика күнінің маңыздылығын арттырды.

Республика күні қарсаңында Павлодар облысының 83 тұрғыны Мемлекет басшысы атынан жоғары мемлекеттік наградаларға ие болды. Оның ішінде 11 павлодарлық «Құрмет» орденімен, «ҚЭЗ» АҚ слесарі Иван Бардашевский мен «УПНК-ПВ» ЖШС бас инженері Иван Федоров ІІІ дәрежелі «Еңбек Даңқы» орденімен марапатталды. Облыстың 20-ға тарта тұрғыны «Ерен еңбегі үшін» медалімен наградталды. Оның ішінде «Каустик» АҚ метрологі Виктор Вахитов, Ж. Аймауытов атындағы облыстық қазақ музыкалы-драма театрының драма әртісі Жұмахан Досбаев, Бауыржан Момышұлы атындағы орта мектеп директоры Майра Мамбетова, «Ирбис» телеарнасының директоры Тимофей Голев пен басқалар бар. Екі азамат ҚР Құрмет грамотасына ие болса, енді біріне «Шапағат» медалі табысталды.

Сый-құрметке ие болғандар еңбектері еленгені үшін облыс басшылығына алғыс айтты.

– Ортақ үйіміздің қалыптасуына зор үлес қосқан азаматтарымыздың еңбектері еленді. Баршаңызға зор денсаулық, ашық аспан және елдің тыныштығын тілеймін, - деді «Құрмет» орденінің иегері Идият Әбдіқалықов.

Салтанатты рәсім ҚР Еңбек сіңірген қайраткерлері Майра Мұхаммедқызы, Айгүл Иманбаева, Маржан Арапбаева және қазақстандық эстрада жұлдыздары Серік Ибрагимов, Дастан Оразбеков, сондай-ақ Иса Байзақов атындағы облыстық филармония камералық хор орындауындағы әндер шырқалған концертке ұласты.

• 23.10.2022
• 274