Қоғамдық ұйым өкілдері басқосты

Астанада «Саяси реформаларды жүзеге асырудағы азаматтық қоғам институттарының рөлі» атты басқосу өтті.
Дөңгелек үстелдің жұмысына ҚР Ақпарат және қоғамдық даму министрі Дархан Қыдырәлі, мемлекеттік органдар, ЖОО мен еліміздің әр өңірінен келген үкіметтік емес ұйым өкілдері қатысты.
Іс-шарада азаматтық қоғам институттарының рөлін нығайту мәселелері талқыланды.
Министр Дархан Қыдырәлі:
«Өздеріңізге мәлім, Мемлекет басшысы Қазақстан халқына Жолдауында елдегі қоғамдық-саяси реформалардың жаңа бағытын жариялады. Оның ішінде азаматтық қоғам институттарының рөлін нығайтуға да басымдық берілген. Атап айтқанда, Президент қазір еліміздің алдында тұрған міндеттер мемлекет пен үкіметтік емес ұйымдардың тығыз ынтымақтастықта жұмыс жүргізуді және азаматтық қоғам институттарын жүйелі түрде жаңғыртуды талап ететінін айтты» - деді.
Осы орайда Дархан Қуандықұлы реформаларды әзірлеу мен оны жүзеге асыру ісіне қоғамдық ұйымдар мен белсенді азаматтардың атсалысып, республикалық және өңірлік деңгейде түрлі диалог алаңдары өз жұмыстарын жалғастырып жатқанын айтты.
Сонымен қатар іс-шара барысында «Қазақстан Халқына» ҚҚ Басқарма төрағасы Болат Жәмішев, ҚР Адам құқықтары жөніндегі уәкіл Эльвира Әзімова, Қазақстан Республикасы Сыбайлас жемқорлыққа қарсы іс-қимыл агенттігі төрағасының орынбасары Дмитрий Малахов, Қазақстан Азаматтық Альянсының президенті Бану Нұрғазиева және қоғамдық бірлестік жетекшілері өз ойларын ортаға салды.

• 27.10.2022
• 266