Солтүстікте 30 мың адамды сүтпен қамтитын мегаферма ашылды

Облыста ауыл шаруашылығында жаңа кешендерді іске қосу жалғасуда. Ғабит Мүсірепов ауданында 1,8 мың басқа арналған «Возвышенка СК» ЖШС-нің мегафермасы іске қосылды. Жобаның құны - 4,5 млрд теңге. 30 тұрақты жұмыс орны ашылды, 60 дейін жеткізбек. Жоба мемлекеттің қолдауымен жүзеге асты.

«Бұл облысымыздағы ең үлкен сүт фермасы және республикадағы ең ірі фермалардың бірі. Толық қуатына шыққанда ферма жылына 9 мың тонна сүт өндіреді. Қарапайым тілмен айтсақ, мегаферма бір жыл бойы 30 мың адамды сүтпен қамтамасыз ете алады», - деп жазды СҚО әкімі Құмар Ақсақалов әлеуметтік желідегі парақшасында.

Мүсірепов ауданында 5 жыл бұрын 3 сүт фермасы жұмыс істеген.  Бүгін алтыншы ферма іске қосылды. «Буденный» және "УК Әділ" серіктестіктерінде  2 ферма салынуда, тағы екі ферманың құрылысы басталады. Ауданда барлығы 10 сүт фермасы жұмыс істейтін болады.

Биыл Қазақстанда 35 өнеркәсіптік сүт фермасының (400 бастан астам) құрылысы жүргізілуде, оның ішінде тек біздің облыста 17 сүт фермасы салынуда. Яғни, салынып жатқан сүт фермаларының тең жартысы солтүстік өңірде. Жыл соңына дейін 8 ферма іске қосылады. Жалпы биыл облыста ауыл шаруашылығы саласында 81,9 миллиард теңгенің 33 инвестжобасы жүзеге асырылуда.

Автоматтандырылған және цифрлық ферма өнімділікті айтарлықтай өсіреді. Егер ескі фермаларда жылына бір бас 3 мың литр берсе, заманауи фермаларда бұл көрсеткіш 7-8 мың литрге жетеді. Осылайша, цифрлық технологиялар өнімділікті 2 есе ұлғайтуға мүмкіндік береді.

• 01.11.2022
• 271