ІТ-саланың Павлодар облысында дамуы талқыланды

Өңір басшысы панельдік пікір алмасу кезінде ІТ мамандарды даярлау процессінің сапасы мен мазмұнын жетілдіруді ұсынды. Павлодар облысында технологиялық жетістіктер мен инновацияларға арналған «Цифровизация күні» - «Digital Day - 2022» форумы өтті.

Бүгінде облысымызда 5 негізгі жоба жүзеге асырылуда. Олардың қатарында жағдаяттық-сараптама орталығы, Smart City Pavlodar, «109 - Бірыңғай байланыс орталығы», eAkimat 365, Геопортал және цифрлық телқосақ бар. Соңғы екі жылда өңірде IT-мамандар даярлау 1200-ден 4800-ға өскен. 4 IT мектеп жұмыс істейді, олардың екеуі AstanaHub резиденті болып табылады. Биылдан бастап Ақпараттық Технологиялар Колледжі жанында IT HUB Jylyjai және Toraighyrov University жанында Computer Science факультеті ашылды.

Әбілқайыр Сқақов осындай жетістіктерге ие бола тұра IT мамандардың даярлау сапасы мен мазмұнын жетілдіру керектігіне тоқталды. Ол үшін IT оқыту факультатив ретінде өткізілетін жаңа типтегі мектептер енгізіле бастайды.

— Бәрін мектептен бастау керек. Мақсат - мектептерде алдағы өмірде негіз бола алатындай дайындық өткізу қажет, — деді облыс әкімі. — IT HUB кәсіби тесттер мен қысқа мерзімді курстар өткізуге жақсы алаң бола алады. Колледждер мен ЖОО-лар сарапшылар пікір алмасатын тұрақты ортаға айналуы тиіс. Бұл жаңа экономиканы тиімді дамытуға мүмкіндік береді.

Бұл дегеніміз, мамандық таңдау IT саласына қарай ығысады деген сөз. Инфрақұрылым сапалы мамандармен толығып, дербес IT қоғамдастық пайда болады. Бастысы, адамдар мен стартаптарды үздіксіз әзірлейтін IT конвейер түзіледі.

— Кез келген жоба IT архитектура құрудан басталып, бұл маман басты рөлдердің біріне ие болады, — деді өңір басшысы. — Алғашқы қателіктерді ескере отырып, IT архитектура құрылып, жоба, мәліметтер базасы мен сервистер пайда болуы тиіс.

Әбілқайыр Сқақов пікірінше, жеке меншік компаниялар дербес IT өнімдер әзірлеуге де ерекше көңіл бөлуі қажет. Сонда ғана компанияның тиімділігі мен бәсекелестікке қабілеттілігі арта түспек.

— Мемлекет ірі IT жобаларды жүзеге асырған кезде бұл салада бәсекелестік тудыруға тырысады, — деді өңір басшысы. — Осы орайда мемлекетке де, жеке меншік секторға да бірдей цифрландырудың зор мүмкіндігі бар. Бізде IT және креативті индустрияның дамуы үшін барлық мүмкіндігі бар.

Панельдік сессия барысында IT саланы дамыту жөнінде өз ұсыныстарын халықаралық сарапшылар білдірді. Олардың қатарында ең ірі әлемдік студияларға арналған 2D және 3D графика жасайтын калифорниялық компанияға инвестиция құйған ресейлік кәсіпкерлік Максим Михеенко да болды. Одан басқа Павлодар облысынан шыққан Booking.com техникалық менеджері Әлібек Дәтбаев, Цифрлық технологиялар мектебінің директоры Қанат Қожахмет және AstanaHub цифрлық технопаркінің өкілдері бар. Сонымен қатар, Cerebra медтехстартап негізін қалаушы әрі СЕО, әлемге танылған компания Medtronic нұсқасы бойынша биыл әлемнің топ-10 медтехстартап тізіміне енген Павлодар тумасы Досжан Жүсіпов те осы пікірсайысқа үн қосты.

Панельдік сессия модераторы ҚТЖ цифрлық трансформация офисінің басшысы, технологиялық кәсіпкер Ержан Наурызбаев облыста болашақ павлодарлық айтишілердің жолын ашатын бірегей IT-экожүйесі бар екендігін ерекше атап өтті. Оның сөзіне қарағанда, Павлодардың IT-бизнесі мен атақты павлодарлық айтишілер енетін IT ассоциация құру керек. Соның көмегімен IT-жастар үшін менторлық тәжірибе енгізуге әбден болады. Әбілқайыр Сқақов бұл ұсынысты қолдап, оны қызықты бастама деп бағалады.

Сонымен бірге форум аясында павлодарлық компаниялардың IT өнімдерінің көрмесі өтті. Мысалы, Кар-Тел (Beeline) цифрлық полицей, AR шалғайдағы сарапшы, private LTE және ақылды ТҮКШ жобаларын таныстырды.

• 02.11.2022
• 336