«Қонаев-Алматы» бағытындағы пойыз бірінші рет жолға шықты

11 қараша облыс тарихындағы айтулы күн болды. Алып шаһар Алматымен араны жалғайтын пойыз таңғы сағат 6:00-де жолға шықты, деп хабарлайды Алматы облысы әкімдігінің баспасөз қызметі.

Өңір халқы үкілеп күткен бұл күні, алғашқы рейс жөнелтілер алдында арнайы салтанатты шара өтті. Оған облыс әкімінің орынбасары, басқарма басшылары, қала әкімі Нұрлан Құматаев, мемлекеттік қызметкерлер, ақсақалдар, «Жолаушылар тасымалы» Акционерлік қоғамының бас директоры, тұрғындар қатысты.

Қос шаһар арасын жалғайтын пойыз үшін екі бекет іске қосылған. Оның бірі «Қапшағай» стансасы болса, екіншісі – автовокзал маңындағы станса. Осы уақытқа дейін жолаушылар Алматыға көлік арқылы жолға шықса, енді кезекте пойызбен де діттеген жерлеріне жететін болады.

Алматы облысы жолаушылар көлігі және автокөлік жолдары басқармасының басшысы Алмас Батановтың айтуынша, билет құны 400-450 теңге.

Сондай-ақ Алмас Батанов билет құнының қолжетімді болып қалуы үшін мемлекеттен субсидия бөлінуі қажет екенін айтты. Ол үшін 2023 жылы мемлекеттік сатып алу бойынша арнайы конкурс ойнатылады. Нәтижесінде жолаушыларды тасымалдайтын компания бекітіліп, пойыздың қатынау уақыты мен бағыты қайта қарастырылады және қажетті қаржы бөлінеді.

Айта кетейік, әуелгі уақытта 1 ай көлемінде пойыз Алматы-1 стансасына қатынаса, желтоқсан айынан бастап Алматы-2 бекетіне жүретін болады.

Оның себебі, мегаполистегі Алматы-2 стансасы метроға жақын екендігімен түсіндірілді.

Жалпы, пойыз Қонаевтан таңғы сағат 6:00- де шықса, Алматы қаласынан кешкі 19:00-де кері қайтады. Алдағы уақытта қосымша бағыт ашылып, пойыз таңғы 6-да Алматыдан Қонаев қаласына аттанатын болады.

«Қос қаланың қонақтары мен тұрғындарына жайлылық сыйлау үшін, екі араға барып келу уақытын жиілету мақсатында Қазақстан Теміржолы компаниясымен Алматыдан бері қарай бағыт ашу бойынша келіссөздер жүргізіп жатырмыз»,-дейді Алмас Батанов.

Алдағы уақытта жоба одан әрі жетілдіріле түспек. Ол үшін жауаптылар бір жыл бойы жолаушылардың пікірлерімен санаса отырып жұмыс жасайтын болады.

Салтанатты жиында пойыздың қызыл лентасын қала ақсақалдары Амангелді Беспаев пен Амангелді Керімбеков қиды.

Ал облыс әкімінің орынбасары Нұржан Кеңесұлы мен «Жолаушылар тасымалы» АҚ директоры Жәнібек Тайжанов болса ізгі тілектерін айтып, тұрғындарды құттықтады.

• 14.11.2022
• 257