Облыс әкімі бизнес-омбудсменмен кездесті

Жамбыл облысының әкімі Нұржан Нұржігітов ҚР Кәсіпкерлерінің құқығын қорғау жөніндегі уәкіл Рустам Жүрсіновпен кездесті.

Жамбыл облысында қазіргі таңда 84 811 шағын және орта бизнес субъектісі тіркелген, бұл өткен жылмен салыстырғанда 18 пайызға артық. Кәсіпкерлік саласында 129 мың адам жұмыспен қамтылып, көрсеткіш 4,8 пайызға өскен.

Ағымдағы жылдың бірінші тоқсанында ШОБ субъектілері 116,2 млрд. теңгенің өнімін өндірді, бұл өткен жылдың сәйкес кезеңімен салыстырғанда 14,6 пайызға артық.

Аймақ басшысы бизнес-қоғамдастықпен тығыз байланыс орнату үшін төрт арнайы алаң іске қосылғанын атап өтті. Олар: инвестициялық штаб, облыстық прокуратура жанынан құрылған сараптамалық кеңес, кәсіпкерлер палатасының өңірлік кеңесінің көмегімен құрылған платформа, іскер әйелдер кеңесі.

Бизнес-омбудсмен Жамбыл облысында кәсіпкерлердің құқықтарын қорғау бағытында атқарылып жатқан жұмыстарды жоғары бағалады.

• 17.11.2022
• 234