Павлодарлық аграрийлер кәсіби мерекесін атап өтті

Өңірдің агроөнеркәсіп кешенінің үздік қызметкерлері кәсіби жұмысындағы табыстары үшін марапаттарға ие болды. Әбілқайыр Сқақов оларды Ауыл шаруашылығы, тамақ және қайта өңдеу өнеркәсібі қызметкерлерінің күнімен құттықтап, астықтың мол түсімі үшін алғыс айтты.
 
Кәсіби мереке күні ауыл шаруашылығының 25 жұмыскері түрлі марапаттарға ие болды. Баянауыл, Успен және Павлодар аудандарының үздіктері бірінші, екінші және үшінші дәрежелі «Еңбек даңқы» төс белгісіне ие болды.  Железин және Баянауыл аудандарының ауыл шаруашылығы саласының ардагерлері «Облыс алдында сіңірген еңбегі үшін» медалімен марапатталды. Төрт ауыл шаруашылығы тауарларын өндіруші салалық кәсіподақ наградаларына ие болса, тағы тоғыз адам облыс әкімінің Құрмет грамоталары мен алғыс хаттарына ие болды. «Жеті ағайын» шаруа қожалығының басшысы Торғай Қожахметовке «Еңбек ардагері» медалі табысталды.
 
– Қырық жылдан астам уақытымды ауыл шаруашылығына арнадым. Жеті балам қазір ата кәсіпті жалғастырып, мал шаруашылығымен айналысып жүр. Бұл марапат мен үшін көп жылғы еңбегімнің ең жоғары бағасы, – деді баянауылдық фермер.
 
Ауыл шаруашылығының қызметкерлерін құттықтау кезінде аймақ басшысы облыста бір миллион тоннадан астам астық жиналғанын атап өтті. Соңғы үш жыл ішінде суармалы алқаптар, сүт өндірісі мен азық-түлік өнімдерін өндіру 1,5 есеге ұлғайды. Павлодар облысы қара құмық пен тары өндірісі бойынша көш бастаса, елімізде өндірілген картоптың әрбір бесінші тоннасы және сәбіздің әрбір үшінші тоннасы біздің өңірімізде жиналған.
 
«Шаруа деген жұмысқа бару үшін оянатын емес, жұмыс орнында ұйқысынан тұратын адам» деп өте дұрыс айтылған, - деді Әбілқайыр Сқақов. – Сіздің ерен еңбектеріңіз бәрімізге үлгі. Сіздер сүйікті кәсіптеріңізге бар уақыттарыңызды арнап, жерлестеріңіздің алдында үлкен жауапкершілік арқалағандықтан жұмыстарыңызды асқан адалдықпен  орындайсыздар.
 
Көрмеде аграрийлер ауыл шаруашылығында қолданылатын суармалы жүйелер мен жасанды интеллектпен жұмыс істейтін дрондарды көрсетті. Сондай-ақ, көрмеге келушілер облысымыздың фермерлері өндірген ет, сүт және нан өнімдерінің дәмін татып көру мүмкіндігне ие болды.

• 18.11.2022
• 348