Облыс әкімі патронаттық отбасылар мен тәлімгерлерді Қамқоршы күнімен құттықтады
Қамқоршылық кеңестердің, патронаттық отбасылардың, тәлімгерлердің, тәрбиешілер мен меценаттардың өкілдерінің кездесуінде қамқорлыққа алынған балаларды тәрбиелеу мәселелері мен балалар үйлері түлектерінің жетістіктері талқыланды. Әбілқайыр Сқақов оларға өскелең ұрпақтың қалыптасуына қосқан үлесі үшін алғыс айтты.
Вадим мен Тамара Мороз 2016 жылдан бері қамқоршылар қатарында. Олардың шешіміне отанасының жұмысы әсер етті. Қазір отбасы алты баланы қамқорлығына алып, тәрбиелеп отырса, олардың үлкендері – Татьяна мен Валентина студент атанып үлгерді.
- Балалар үйінде жұмыс істегендіктен түлектерге тәуелсіз өмір бастауда қолдау қажет екенін білдім. Мен балалардың көбіне көмектескім келді, – дейді Тамара Мороз. – Сондықтан, жұбайым екеуміз бала асырап алуды шештік, осылайша отбасымызда қамқорлыққа алынған балалар пайда болды.
Шамамен бес жыл бұрын дизайнер Ольга Кутенкина тәлімгерлік жолын таңдады. Ол он жеті жасар Милена үшін анасы, досы әрі өзінің сүйікті кәсібі - тігін ісі бойынша ұстазына айналды.
– Біз жылы әрі мейірімді қарым-қатынас орнаттық. Қызыма болашақ өмірде қолдауды сезініп, өзіне сенімді болуы үшін үнемі көмектесемін, - деді тәлімгер.
Мереке қонақтарының қатарында меценаттар, тәрбиешілер және балалар үйінің түлектері болды. «Жаса» одағы» қоғамдық қорының директоры Денис Лукянчук балалар үйінің тәрбиеленушілеріне Ақтау қаласына саяхаттауға жолдама сыйлады. Шақат ауылындағы отбасылық үлгідегі балалар үйінің түлегі Айжан Оралованың оқиғасы да өз үлгісімен шабыттандырады. Ол Иса Байзақов атындағы облыстық филармонияның әртісі және бос уақытында кішкентай балаларға музыкадан сабақ береді.
Облыс әкімі мұндай кездесулер жақсы дәстүрге айналғанын атап өтті. Ол ата-анасының жылуына мұқтаж баланы қабылдау оңайлыққа соқпайтынын, әрі зор жауапкершілік екенін атап өтті.
– Бәріңізге шынайы алғысымды айтамын. Жанының жылуы мен жүрегінің мейірін панасыз балаларға бөлетіндердің барлығына ризамын. Сіздердің сүйіспеншіліктеріңіз бен қамқорлықтарыңыздың арқасында балалар өздерінің өмір жолын табатынына сенімдімін, - деді Әбілқайыр Сқақов. – Балалар үйінің тәрбиеленушілерін қамқорлыққа алу, қорғаншылық және патронаттық тәрбие арқылы отбасы құндылықтарын дамыту бойынша жұмыс жалғаса береді.
Соңғы үш жыл ішінде өңірде бала асырап алушы ата-аналардың тоғыз мектебі ашылды. 2020 жылдан бері мемлекеттік қордан балалар үйінің 517 түлегі баспана алса, биыл 134 жетім бала пәтер кілттеріне ие болды
- 19.11.2022
- 371
