Құрметті замандастар!

Сіздерді Ашық Үкімет блогындағы өзімнің парақшамда көргеніме қуаныштымын!

Елбасы Нұрсұлтан Назарбаев 2017 жылы «Болашаққа бағдар: қоғамдық сананы жаңғырту» мақаласын жариялап, қазақстандықтардың ХХІ ғасырдағы даму жолының басты бағыттарын айқындап берді және «Рухани жаңғыру» бағдарламасының идеологиялық платформасын жасады.

Елбасы бастаған саяси бағыттың мирасқоры ретінде бұл жұмысты қазіргі Президент Қасым-Жомарт Тоқаев та жалғастыруда. Өзінің жолдауында Мемлекет басшысы Елбасы жасаған бес институционалдық реформа мен Ұлт жоспарын жүзеге асыру қажеттілігін айтып, Жаңғырту жөніндегі ұлттық комиссияны қайта жандандыру керектігін атап өтті.

Бүгінде «Рухани жаңғыру» – Қазақсан Республикасының 2025 жылға дейінгі Стратегиялық даму жоспары бойынша жаңа адам капиталын дамытудың негізгі жүйелік реформаларының бірі.

Бағдарламаның басты мақсаты – Ұлт санасын жаңғырту жүйесін мемлекеттік деңгейде жүзеге асыратын механизм құру. Ал барлық жүргізіліп жатқан жұмыстардың негізі әр қазақстандықтың болашаққа апарар жолындағы басты даму бағдары болатын «Бәсекеге қабілеттілік», «Прагматизм», «Ұлттық бірегейлікті сақтау», «Білімнің салтанат құруы», «Сананың ашықтығы» және «Қазақстанның революциялық емес, эволюциялық дамуы» деген 6 бағыт бойынша жүзеге асуда.

Институтымыздың миссиясы – қазақстандық қоғамның қажеттілігін сараптау және бәсекеге қабілетті заманауи қазақстандық қоғам құруға ат салысып жатқан барлық құрылымға ғылыми және әдістемелік ұтымды, әрі шешімді жолдарды көрсету. 

Бүгінде Институт қызметкерлері «Рухани жаңғыру» бағдарламасының Даму стратегиясын жасап шықты. Осы бойынша жұмыстар үш бағытта жүреді. Олар: Тұлғаның дамуы, біртұтас ұлтты түзу және мемлекетті, азаматтық қоғамды және жергілікті қоғамды дамыту. Бұл қадам арқылы жобаларды жүйелі түрде дамытуға және жүргізіліп жатқан жұмыстарға қоғамның барлық санатын қосуға мүмкіндік аламыз деп сенеміз.

Бұл блог сындарлы диалог құру үшін, пікір алмасып, қызықты ұсыныстарды жүзеге асыру үшін жақсы алаң болады деп шын жүректен сенемін. Сіздердің барлық сұрақтарыңызға құлшыныспен жауап беруге әрдайым әзірмін.

Құрметпен, «Рухани жаңғыру» Қазақстандық қоғамдық даму институты» КеАҚ Төрағасы Асылбек Есенбаев