Телтаев Б.Б.

«Қазақстан жол ғылыми-зерттеу институты» АҚ президенті

1966 жылы 23 наурызда Жамбыл облысы Мерке ауданы Жауғаш батыр ауылында дүниеге келген.

Еңбек жолын 1991 жылы Алматы автомобиль-жол институтын үздік бітіргеннен кейін «Автомобиль жолдары» мамандығы бойынша инженер-құрылысшы біліктілігін алғаннан кейін бастады.

1991 жылдан 1996 жылға дейін «Жолдарды жобалау» кафедрасында жаттығушы-оқытушы, ассистент, аға оқытушы, жол-механикалық факультеті деканының орынбасары болып жұмыс істеді. 1994 жылы өндірістен қол үзбей аспирантураны, ал
1998 жылы - Қазақстан Республикасы Ұлттық Ғылым академиясының механика және машинатану институтының докторантурасын бітірді.

1996 жылдан 1999 жылға дейін аға оқытушы, доцент және профессор, ал 1999 жылдан 2002 жылға дейін «Автомобиль жолдарын жобалау, салу және пайдалану» кафедрасының меңгерушісі, 2002 жылдан 2006 жылға дейін М. Тынышпаев атындағы Қазақ көлік және коммуникация академиясының «Көлік құрылыстарын салу» кафедрасының меңгерушісі қызметтерін атқарды.

Телтаев Б.Б - 750-ден астам ғылыми және ғылыми-әдістемелік еңбектердің авторы. Олардың ішінде 8 монография мен 30-дан астам патенттер, 60-тан астам нормативтік құжаттар, 10 оқулық, 5 терминологиялық сөздіктер бар.

Ол 3 ғылыми жаңалықтың авторы болып табылады: 1- «Төменгі температуралы жарықшақтану кезінде асфальтбетон жол жамылғысының өзіндік ұйымдасу заңдылығы» (2016 жыл, № 495 диплом), 2 - «Тұтқыр серпімді материалдардың сатылық қажып бұзылу заңдылығы (Телтаев қағидасы)» (2017 жыл, № 501 диплом),  3 – «Наноқұрылымды битумның пайда болу құбылысы» (2019 жыл, №516 диплом).

Профессор Teлтаев Б.Б.  республикада бірінші жол ғылыми мектебін құрды және жоғары білікті мамандардың үлкен тобын дайындады. Оның ғылыми жетекшілігімен 5 доктор және 28 ғылым кандидаты даярланды.Олар жол және көлік мекемелерінде, ЖОО мен ҒЗИ сәтті еңбек атқарып келеді.

2006 жылы Б.Б. Телтаевтың басшы болып келуімен Қазақстан жол ғылыми-зерттеу институтын дамыту және республикадағы жол ғылымының деңгейін арттыру бойынша үздіксіз кешенді жұмыс басталды. Институтта АҚШ, Англия, Германия, Франция, Голландия, Италия, Австралия және басқа елдердің заманауи құралдарымен, қондырғыларымен және жабдықтарымен жабдықталған жаңа мамандандырылған зертханалар құрылды. Бұл зертханалық кешеннің бұрынғы Кеңес Одағының бүкіл аумағында теңдесі жоқ және көптеген еуропалық жол зертханаларынан асып түседі. Жол материалдарының беріктігі мен ұзақ мерзімділігінің сипаттамаларын тәжрибелік бағалау үшін жаңа қондырғылар ойлап шығарылды, жасалды және жаңа әдістер әзірленді. Қазіргі заманғы компьютерлік, лазерлік және навигациялық құралдармен және жабдықтармен жабдықталған көпфункционалды жылжымалы жол зертханалары (Дания, Ресей) сатып алынды. Бүгінде институт әлемдегі күшті жол ғылыми орталықтарының біріне айналды, оның есімі мен еңбектері бүкіл әлемге танымал болды.

Телтаев Б.Б.- «Қазақстан жол ғылыми-зерттеу институтының хабаршысы» ғылыми-өндірістік журналының бас редакторы, «Geomechanics and Engineering» (Сеул, Оңтүстік Корея), «Magazine of Civil Engineering» (С-Петербург, Ресей), «Жол саласындағы ғылым мен техника»  (Мәскеу), «Ынтымақтастық жолдары» (Мәскеу), «ҚР Ұлттық инженерлік академиясының жаршысы» және «Қазақ көлік және коммуникациялар  академиясының жаршысы» журналдарының редакторлық кеңестерінің мүшесі. Сондай-ақ, Ол- ағылшын тілінде шығарылатын «Applied Sciences» Халықаралық ғылыми журналының «Asphalt Materials»атта 2 арнайы шығарылымының бас редакторы (MDPI, Швейцария). Сондай-ақ, Elsevier, Taylor&Francis (Еуропа), Techno-Press (Оңтүстік Корея) сияқты әлемдегі беделді баспалар шығаратын бірнеше жоғары рейтингтік халықаралық ғылыми журналдардың рецензенті.