Әлібек Асқар

«Шайсұлтан Шаяхметов атындағы «Тіл-Қазына» ұлттық ғылыми-практикалық орталығы» КЕАҚ-ның Бас директоры

Әлібек Асылбайұлы Асқар 1951 жылы 24 қаңтарда Шығыс Қазақстан облысы Катонқарағай ауданында дүниеге келген.

Алматы Көркемсурет училищесін, С.М. Киров атындағы Қазақ мемлекеттік университетінің  журналистика факультетін бітірген.

Еңбек жолын 1975 жылы «Білім және еңбек» журналы редакциясында корректор, көркемдеуші редактор, әдеби редактор, бөлім меңгерушісі қызметтерінен бастаған. 1986 жылы мемлекеттік «Өнер» баспасына бас редактор болып тағайындалады.

1991 жылдан – Қазақстан Республикасының Президенті мен Министрлер Кабинеті аппаратында жауапты қызметтер атқарады. 1993 жылдан – ҚР Баспасөз және бұқаралық ақпарат  министрінің орынбасары, бірінші орынбасары, 1998 жылдан Қазақстан Республкасы Мәдениет және қоғамдық келісім министрлігінің Баспа және полиграфия істері жөніндегі департамент директоры, 2006 жылдан – Қазақстан Республикасы Президенті Әкімшілігінде Мәдениет секторының меңгерушісі, бас инспектор, Ішкі саясат бөлімі меңгерушісінің орынбасары болады. 2012 жылдан –  Астанадағы Ұлттық академиялық кітапхананың, Алматыдағы Ұлттық кітапхананың бас директоры, «Ұлттық мемлекеттік Кітап палатасы» РММ-нің директоры қызметтерін атқарады.

2019 жылдың сәуір айынан бастап «Шайсұлтан Шаяхметов атындағы «Тіл-Қазына» ұлттық ғылыми-практикалық орталығы» КеАҚ-ның бас директоры лауазымына тағайындалды.

Ә.Асқар Қазақстанның еңбек сіңірген қайраткері, Қазақстан Республикасы Мемлекеттік сыйлықтың лауреаты, «Парасат» орденінің, бірнеше медальдардың иегері. Ол көптеген прозалық кітаптардың авторы, Қазақстан Журналистика акдемиясының академигі, Қазақстан Көркемсурет академиясының академигі.