Менің жеке блогыма қош келдіңіздер!

«Отырар мемлекеттік археологиялық қорық-музейі» РМҚК - археологиялық жәдігерлерді зерттеу, қазба жұмыстарын жүргізетін, реставрация және консервация арқылы ескерткіштердің сақталуын қадағалайтын, сонымен қатар халқымыздың этнографиялық және рухани, мәдени мұраларын жинақтап сақтау, зерттеу жұмыстарын жүргізетін мекеме.

Елбасымыз Н.Ә.Назарбаев «Ұлы Отырар – қазақ өркениетінің алтын діңгегі» - деп атап көрсеткендей, тарихи тамыры тереңде жатқан көне шаһар Отырар, Қожа Ахмет Иасауидің ұстазы болған Арыстанбаб әулиенің кесенесі халқымыздың жауһар қазыналары мен ұлтымыздың рухани құндылықтарының бірі болып табылады. Шығыстың ғұлама ойшылы Әбу Насыр әл-Фарабидің туған жері сан мың жылдық тарихы бар бұл өңір ұлтымыздың ұлылығын ұлықтайтын тарихи және мәдени ескерткіштерге бай өлке.

Президент Қ.Тоқаев «Еліміздегі туризм саласының қазіргі ахуалын түбегейлі өзгертетін уақыт келді» - дей келе, Қазақстанның барлық өңірінде туризм аймағы болуға лайықты киелі орындарды атап өткен болатын. Қазақстанның киелі жерлерінің географиясына енген киелі орын – Отырарға бүгінде қызығушылық танытқан туристер саны артуда.

Еліміздің және Отырар өңірінің маңызды тарихи-мәдени және сәулет ескерткіштерін қайта жаңғырту және оларға кешенді ғылыми зерттеу, сондай-ақ археология, этнография, тарих салаларының мәселелері туралы жаңа көзқарас пен көкейтесті қызықты тақырыптарды талқылауға шақырамын.

Блог тағы да бір пайдалы байланыс және туындаған мәселелерді шешудің тиімді құралы болады деп сенемін.