АЛҒЫ СӨЗ

     «Баспасөз – өмір айнасы» дейді халық арасында. Ия, осынау қанатты сөз баспасөзге берілген әділ баға дер едім. Заман жақсарған сайын ақпарат құралдарының да беделі көтеріліп отырғаны жасырын емес. Әр саналы тұлғаның баспасөзге деген көзқарасы оң болуы керек. Кез келген адам күнделікті тірлікте компьютер тегігін басып, әлемдік ғаламтор арқылы жаңалықтарға сусындай алмасы анық. Бүгінгі жаңа заманда осындай дайын дүниелер заман талабына сәйкес керек екенін де білеміз. Дегенмен, өскелең ұрпаққа тигізер кері әсері де бар екендігін біліп жатқанымыз шындық.  Интернетке жіпсіз байланған жандардың газет-журналдардың бетін ашуға, әдеби шығармаларды оқуға құлшынысы азайғаны қашан.  Баспасөзге көз жүгіртіп, жаңалықтарға елеңдемеген, көркем шығарманы оқымаған жастар ғана емес, ересектердің де сөздік қоры азайып, өз ойларын жүйелі де еркін жеткізе алмайтыны сезілуде. Ал, біздер санаға сіңген дағды бойынша баспасөзге жанашырлық танытуды міндет санаймыз.

    Аудандық қоғамдық-саяси, әлеуметтік-экономикалық «Талғар» газеті 86 жылдық тарихы бар басылым. Газетімізде ауданымыздың тыныс-тіршілігі, жаңалықтар мен түрлі тақырыптардағы мақалалар жарияланып  келеді. Аптасына бір рет жарық көретін газетіміздің көлемі ұлғайып, әр нөмірі полиграфиялық безендірілуі жағынан да, материалды сан-салалы тереңдей әрі жан-жақты қамтып, мәселе көтеруіндегі жаңаша бетбұрыс жасауда. Бұл жерде журналистердің кәсіби шеберлігінің шыңдалу ерекшелігі бар екендігін айтқым келеді. Басылым бетінде аудан көлеміне танымал белгілі адамдардың өнегелі істері, өмір белестерінен мазмұнды дүниелерге орын берілуде. Сананы жаңғыртып, білімді тереңдететін танымдылық жағынан мағыналы мақалалар, экономикалық даму, мәдени, асыл мұралар, бүгінгі ауылдың кескін-келбеті де әңгіме арқауы болып тұрады. Өскелең ұрпақ тәрбиесіне қатысты мақалалар жиі жарияланады. Газетіміздің сайты, әлеуметтік желіде парақшалары да бар. Онда аудан жұршылығына қызықты материалдар, жаңалықтар, хабарлар жарияланып отырады.