Маңғыстауда балық өсіру көлемін 52 мың тоннаға дейін жеткізу жоспарлануда

Өндіріс көлемін 52 мың тоннаға дейін жеткізу мақсатында облыста 2030 жылға дейін 218 млрд теңгеге 8 жобаны жүзеге асыру жоспарлануда. Бұл туралы өңір басшысы Нұрлан Ноғаевтың төрағалығымен өткен кеңесте Маңғыстау облысының балық шаруашылығы басқармасының басшысы Арман Молдашев мәлім етті, деп хабарлайды Маңғыстау облысы әкімінің баспасөз қызметі.

Маңғыстау облысында 2022 жылы балық шаруашылығынан бюджетке 47 миллион теңгеден астам түсім болған. Басқарма басшысының айтуынша, бұл салаға мемлекеттік қолдау бойынша биыл 10,5 млн. теңге бөлініп, оның 9,532 млн. теңгесі игерілген.

-Алдағы жылдары балық өсірумен айналысатын 8 жобаны іске асыру жоспарланған. Бұл жобаларды іске асыру арқылы балық өсіру көлемін 52 мың тоннаға дейін жеткізуді көздеп отырмыз. Салаға 218 млрд. теңге инвестиция тартылып, 278 жаңа жұмыс орындарын құру жоспарлануда. Ал, заңсыз балық аулауға келер болсақ, тиісті органдармен бірігіп, қадағалау шаралары өткізілді. Биыл 393 заң бұзушылық анықталды. Оның 70-і қылмыстық, 323 әкімшілік іс, - деді басқарма басшысы Арман Молдашев.

Аймақ басшысы Нұрлан Ноғаев балық шаруашылығы саласында кәсібін бастаймын дейтіндерге мемлекет тарапынан қолдау көбейгенін атап өтті.

-Қазір мемлекет тарапынан бұл салаға тиісті қолдаулар артып келеді. Тек жұмысты реттеп, жандандыру керек. Ол үшін нақты жоспарлар қойылып, жүйелі жұмыс жасалуы керек. Балықшыларға қолдау көрсетіліп, олар да өздеріне қатысты жауапкершілік ала білулері қажет. Осы кәсіппен айналысып жүргендерге айтарым - нақты ұсыныстарыңызды реттеп бізге беріңіздер, талқылаймыз, нақты жоспар жасайық. Ашықтық болсын. Тетігін тауып балық өсіру мен аулауды заңды кәсіп көзіне айналдыра білуіміз керек, - деді аймақ басшысы.

• 06.12.2022
• 213