Қазақстан Президенті Қасым-Жомарт Кемелұлы Тоқаев Қарағанды облысында жұмыс сапарымен болып қайтты.

Сапар барысында мемлекет басшысы 1 200 орындық жаңа мектеп-гимназияда болды.

Аталған білім ордасына жақын жерлердегі қазақ мектептерінен 900 оқушы ауыстырылған. Бұл үш ауысымда оқыту мәселесін шешуге бағытталып іске асырылып жатқан жұмыстар болып табылады.

Сондай-ақ Президент жаңа мектеп-гимназияға Абайдың есімін беру жөніндегі ұсынысты қолдайтынын атап өтті.

Қарағандының жаңа теннис орталығында Қасым-Жомарт Кемелұлы жас спортшылармен кездесіп, орталықтың техникалық жабдықталуын қарап өтті. Енді мұнда халықаралық және республикалық деңгейдегі теннис турнирлерін өткізуге мүмкіндік бар. Нысанның инфрақұрылымы үздік әлемдік стандарттарға жауап береді және 11 кортты қамтиды. Оның 7-і жабық корт, сондай-ақ мұнда жалпы және арнайы дене шынықтыру залдары бар. Президент үстел теннисі орталығын да аралап көрді. Мұнда күн сайын 400 адам үстел теннисімен айналыса алады. Ағымдағы жылы облыста барлығы 85 спорт нысанын пайдалануға беру жоспарлануда.

"Сарыарқа" арнайы экономикалық аймағының аумағында Президентке "ЛиндеГаз Қазақстан", "КазСолар-50", "Изоплюс" және "Бёмер Арматура" қазақстандық-неміс компанияларының басшылары өз жобалары туралы баяндады. Мемлекет басшысы өз сөзінде жаңартылатын энергия көздерімен байланысты жобаларды жүзеге асырудың маңыздылығына назар аударды. Содан кейін Президент заманауи канадалық өндіріс технологиясы енгізілген Steel Manufacturing зауытының өндірістік желілерін аралап көрді. 

YDD CORPORATION зауытында Президент болатты, шойын қорытпаларын балқыту және легирлеу кезінде металдардың механикалық және коррозияға төзімділігін жақсарту үшін қолданылатын жоғары сапалы ферросилиций өндірісімен танысты. Зауыттың қуаттылығы жылына 180 мың тонна өнімді құрайды. Жобаның қазақстандық мазмұнының үлесі 95% - дан астам. Қазіргі уақытта зауыт әлемнің 37 еліне өз өнімдерін экспорттайды. Сондай-ақ, Президент өндірісті басқару орталығын аралап, Qaz Qarbon жаңа жобасының іске асырылуымен танысты.

Мемлекет басшысы "АрселорМиттал Теміртау" АҚ металлургия комбинатының ыстықтай мырыштау және алюминилендіру цехында дайын өнім мен тиеу желісін аралап көрді. 

Мырышпен қапталған табақшаларға конструкциялық материалдар өндірісі мен құрылыста сұраныс жоғары. Металлургия өндірісіндегі бұл өнімнің қосымша құны да жоғары болып табылады.

Сондай-ақ «АрселорМиттал Теміртау» АҚ бас директоры Наир Биджу Мемлекет басшысына кәсіпорынды одан ары дамыту перспективасы, жаңа кокс батареясы құрылысының жоспары, экологиялық қалдықтарды азайту жөнінде қабылданып жатқан шаралар жайында мәлімет берді. Сонан соң Қасым-Жомарт Тоқаев металлургия зауытының еңбек ұжымымен әңгімелесіп, олардың жұмыстарына табыс тіледі.

• 24.11.2020
• 260