Маңғыстауда облыстық мәслихаттың XVI сессиясы өтті

Бүгін, 9 желтоқсанда Маңғыстау облыстық мәслихатының XVl сессиясында 2023-2025 жылдарға арналған бюджет жобасы мақұлданды, деп хабарлайды Маңғыстау облысы әкімінің баспасөз қызметі.

Маңғыстау облысы экономика және бюджетті жоспарлау басқармасының басшысы Марина Әлібекованың айтуынша, бюджет құрылымындағы негізгі үлесті (71,1%) әлеуметтік салаға жұмсайтыншығыстар құрайды.

– 2023-2025 жылдарға арналған жаңа үш жылдық бюджет қабылданды. Облыстық бюджеттен энергетика саласына, тұрғын үй-коммуналдық шаруашылыққа, ауыл шаруашылығына басымдық бере отырып қаржы бөлу туралы шешім қабылданды. Құрылысы аяқталу сатысында немесе жүргізіліп жатқан жобалар да басты назарда болды. Сондай-ақ, «Өңірлерді дамыту», «Нұрлы жер», «Ауыл ел бесігі», «Нұрлы жол» бағдарламалары аясында 31 жоба жүзеге асырылады, - деді Марина Әлібекова.

Аймақ басшысы Нұрлан Ноғаев алға қойылған мақсаттарға қол жеткізу үшін бірлескен нәтижелі жұмыс қажет екенін айтып, қолдау білдірген депутаттарға алғыс айтты.

• 09.12.2022
• 242