Ералы Тоғжанов: Ардагерлерімізге белсенділіктері үшін алғыс айтамын, олардың өмірлік тәжірибесі мен кеңестері маңызды

Ақтөбе облысының әкімі Ералы Тоғжанов облыстық ардагерлер кеңесінің пленумына қатысты. Отырыс барысында қарттарды әлеуметтік қорғауға қатысты мәселелер қаралды.

        Өңір басшысы облыста 97500-ге жуық ардагер бар екенін, облыстық, қалалық, 12 аудандық ардагерлер кеңесі, 307 бастауыш ұйым жұмыс істейтінін алға тартты.

                 «Бүгін өздеріңізбен осындай салиқалы ойлар мен салмақты пікірлер айтылатын жиында қауышу мен үшін мәртебе. Қариялық – даналық пен өмір тәжірибесінің қайнар көзі.  Тарихы 1987 жылдан басталатын ардагерлер ұйымын бүгінде өз алдына бір институт деп толықтай айтуға болады. Бұл институттың негізгі міндеттері – елдің бірлігін, тұрақтылығын сақтау, өскелең ұрпақты тәрбиелеуге үлес қосу. Қоғамдық іс-шараларға белсене қатысып, өңірдің әлеуметтік-экономикалық дамуына қосып жүрген үлестеріңіз біз үшін маңызды», - деп Ералы Тоғжанов облыстық ардагерлер кеңесі мүшелерінің еліміздің қалыптасуындағы рөлін атап өтті.

          Облыс әкімі халықтың табысын арттыру, мемлекеттік бағдарламалардың мүмкіндіктерін тиімді пайдалану, инвестициялар тарту, жаңа жұмыс орындарын құру, әлеуметтік маңызы бар тауарлардың бағасын тұрақтандыру бойынша қабылданып жатқан шаралар туралы ардагерлерді хабардар етті.

       Сонымен қатар, ардагерлердің лайықты өмір сүруіне  мемлекет барлық жағдайды жасаған. Оларға материалдық көмек көрсетіп, кейбір санаттағы қарттардың коммуналдық шығындарын төлеп келеді.

        Өңірде жыл басынан «Белсенді ұзақ өмір сүру» жобасы аясында 8 орталық іске қосылды. Ашылған орталықтардың төртеуі Ақтөбе қаласында болса, Алға, Қобда, Мәртөк, Хромтау аудандарында бір орталықтан.

         Орталық салауатты өмір салтын ұстануға, компьютерлік сауаттылықты арттыруға септігін тигізуде. Сондай-ақ, мұнда скандинавиялық әдіспен жүріс, йога, үстел теннисін үйренуге және ағылшын тілін оқуға мүмкіндік бар.

         Облыстық білім саласы бойынша ардагерлер ұйымының төрағасы Кенжеғазы Байғазин ардагерлерге сауықтыру демалысын ұйымдастыруға қатысты мәселені тілге тиек етті.

         Ардагер, «Степное» ЖШС директоры Аманғос Төлеуов облыстың ірі компаниялары мен шаруашылықтарын тарта отырып, ардагерлерді бюджеттен тыс қаражат есебінен сауықтыру мәселесін шешуге болатынын айтып, бастама көтерді.

         Кездесу соңында облыс әкімі тәуелсіз Қазақстанның дамуына, қоғамдағы бірлік пен тұрақтылықты сақтауға, мемлекет басшысының тапсырмаларын орындауға, жастарға патриоттық тәрбие беруге ардагерлердің елеулі үлес қосып жатқанын атап өтті.

      «Біздің міндетіміз – сіздер үшін барлық жағдайды жасау», - деген Ералы Тоғжанов, алдағы уақытта да өңірде жүзеге асырылатын барлық бастамалар мен жобаларды ардагерлердің қолдайтынына сенім білдірді.

• 10.12.2022
• 296