Алматы қаласында Орталық Азия мен Ауғанстан үшін арналған БҰҰ-ның Тұрақты даму мақсаттары бойынша өңірлік хабын ашу мәселесі пысықталуда

ҚазМЗУ Университетінде «Дамудың тұрақтылығын қамтамасыз ету ҚР Президентінің Қазақстан халқына Жолдауын іске асырудың негізгі миссиясы ретінде» атты семинар өтті. Іс-шараға ҚР Ұлттық экономика министрлігінің, Экономикалық зерттеулер институтының және БҰҰ Даму Бағдарламасының өкілдері қатысты.

Өз сөзінде ҚР ҰЭМ Әлеуметтік саясат және мемлекеттік органдарды дамыту департаментінің директоры Нұргүл Жанназарова Тұрақты даму мақсаттарын ілгерілету бойынша жүргізіліп жатқан жұмыстар туралы баяндады.

Атап айтқанда, ТДМ Үйлестіру кеңесінің мәртебесін арттыру, тұрақтылық пен инклюзивтілік қағидаттарын елдің 2025 жылға дейінгі жаңа Ұлттық даму жоспарының негізіне енгізу, сондай-ақ ұлттық жобалар арқылы Тұрақты дамудың стратегиялық мақсаттарын оқшаулау туралы айтылды.

Қазіргі уақытта Алматыда қаласында Орталық Азия мен Ауғанстан үшін арналған БҰҰ-ның Тұрақты даму мақсаттары бойынша өңірлік хабын ашу мәселесі пысықталуда, ол өңірлік күн тәртібінің өзекті мәселелерін шешеді. Бұған дейін БҰҰ-ның 77 сессиясында ҚР Президенті Қасым-Жомарт Тоқаев тиісті бастама көтерген болатын.

Өз кезегінде «Экономикалық зерттеулер институты» АҚ Басқарма төрағасы Руслан Сұлтанов ел өңірлерінде ТДМ бойынша кең ауқымды түсіндіру жұмыстары жүргізіліп жатқанын атап өтті. Бұл жұмысқа мемлекеттік органдар, үкіметтік емес және халықаралық ұйымдар белсенді қатысуда.

Сондай-ақ семинар барысында қатысушылар сапалы білім беру, гендерлік теңдік, халықтың ауыз суға қол жеткізуі, экожүйені қалпына келтіру және жол-көлік оқиғаларының нәтижесінде болатын өлім-жітім мәселелерін қозғады.

Осылайша, семинар Тұрақты даму мақсаттарын іске асыру мәселелерін талқылауға және тәжірибе алмасуға мүмкіндік беретін алаңға айналды.

• 13.12.2022
• 307