ҚР Ұлттық экономика министрі Францияда бірқатар кездесулер өткізді

Парижде Әлібек Қуантыров Экономикалық ынтымақтастық және даму ұйымының (ЭЫДҰ) Қаржы және корпоративтік мәселелер жөніндегі директоры Кармин Ди Нойямен кездесті.

Ә.Қуантыров Қазақстандағы инвестициялық ахуалды жақсарту жөніндегі шаралар туралы айтып, біздің еліміз 2017 жылдан бастап ЭЫДҰ Инвестициялар комитетінің «Қауымдастырылған мүшесі» болып табылатынын еске салды.

Тараптар осы бағыттағы тығыз ынтымақтастық серіктестік қатынастарды дамытуға, әсіресе ҚР инвестициялық тартымдылығы бөлігінде жаңа серпін беретініне сенім білдірді.

«Қазақстан ЭЫДҰ стандарттарын кезең-кезеңімен енгізу бойынша белсенді жұмыс жүргізуде және оған барынша мән береді. Біз 2025 жылы ЭЫДҰ-ға кіруге өтінім дайындауды жоспарлап отырмыз. Мақсат тек Ұйымға кіру емес. Ең бастысы - ЭЫДҰ стандарттарын қолдана отырып, азаматтардың өмір сүру деңгейі мен әл-ауқатын арттыру, бизнес жүргізу жағдайын жақсарту және тұтастай алғанда, елді дамыту», - деді Ұлттық экономика министрі.

Министр болашақта Қазақстан ЭЫДҰ-ның мемлекеттік компанияларды Корпоративтік басқару жөніндегі басшылық қағидаттарына қосылуға ниетті екенін атап өтті.

Сондай-ақ, ҰЭМ басшысы ЭЫДҰ Мемлекеттік басқару жөніндегі директорының орынбасары Янош Бертокпен кездесті.

Министр атап өткендей, Қазақстан ұлттық экономиканы дамыту мақсатында ЭЫДҰ саясатын ұстанады.

«Қазақстандық тарап ЭЫДҰ-мен өзара іс-қимылды одан әрі нығайтуға дайын. ҚР Үкіметі 2030 жылға дейінгі Мемлекеттік басқаруды дамыту тұжырымдамасын қабылдады, мемлекеттік органдардың көмекші қызметтерін орталықтандыру және мемлекеттік басқару жүйесінде орталықсыздандыру жұмыстары жүргізіліп жатыр», - деді ол.

Келіссөз барысында ҚР Ұлттық экономика министрлігі 2023 жылы «Қазақстан мен ЭЫДҰ арасындағы мемлекеттік басқару реформасына қатысты диалогқа жәрдемдесу: кешенді қатысу туралы ұсыныс» Келісіміне қол қоюды жоспарлап отырғаны атап өтілді.

ЭЫДҰ Еуразия бөлімінің басшысы Уильям Томпсонмен кездесу барысында ҰЭМ басшысы ҚР Үкіметі мен ЭЫДҰ арасындағы өзара түсіністік туралы Меморандумға өзгерістер енгізу туралы Хаттамаға қол қою озық тәжірибелерді енгізуге және ҚР-дың ЭЫДҰ-ға кіруге мүмкіндік беретінін ерекше атап өтті.

Сонымен қатар, Ә.Қуантыров Француз даму агенттігінің (ФДА) атқарушы директоры Филипп Ориланжбен кездесу өткізді. Тараптар Қазақстан мен ФДА арасындағы ынтымақтастық мәселелерін талқылады.

Естеріңізге сала кетейік, өткен жылы ҰЭМ мен ФДА арасында өзара түсіністік және ынтымақтастық туралы Меморандумға қол қойылды. Оның шеңберінде тараптар энергетика, гидроэнергетика, энергия үнемдейтін және тиімді энергия технологияларын дамыту, сумен жабдықтау, санитария, қоршаған ортаны қорғау, ауыл шаруашылығы және ирригация сияқты салаларды дамытуға қаржылық және техникалық жәрдемдесу бойынша ынтымақтасуға ниетті.

• 13.12.2022
• 293