Облыс әкімі ақтөбелік айтыскер ақындармен кездесті

   Ақтөбе облысының әкімі Ералы Тоғжанов  айтыс өнеріне сүбелі үлес қосып, дамуына септігін тигізіп жүрген ақтөбелік айтыскер ақындарымен кездесті.

          “Айтыс ақындары ел ішіндегі мәселелерді үнемі жырлап, тиісті орындардың назарына іліккенін ешкім де жоққа шығара алмайды. Әр ақын өз заманының көтерген көкейтесті мәселесіне жауап бере алатын деңгейде болуы керек. Оның тек ақын болуы бұл жерде жеткіліксіз, сөз саптауын, жауапкершілігін, айтылған сөз атылған оқ екенін сезінуі тиіс. Сондай-ақ көркем сөздің де қадір-қасиетін жоғалтпауымыз керек. Кейде халықтың  қошеметімен  артық, арзан сөздер айтылып кетіп жатады. Дегенмен айтыс өз табиғатынан ажырамауы тиіс”, - деп атап өтті Ералы Тоғжанов.

          Кездесуде айтыс өнері, оның өңірде дамуы жайында ақындар өз ойын білдіріп, пікірлерін айтты. Сондай-ақ, Ақтөбе өңірінің аудандарында облыстық, республикалық айтыстарды ұйымдастыруды да ұсынды.

          “Төл өнерді өңірімізде ұлықтауға көп көңіл бөлініп отыр. Биыл облыстық, республикалық айтыстар өткізілді. Алайда бұл өте аз. Үнемі ұйымдастыруға қолдау білдіруіңізді сұраймын. Мәселен, аудандарда айтыс ұйымдастырып, ақтық мәресін облыс орталығында өткізсек деген ниет бар. Бұл шаралар облыстағы айтыскерлеріміздің, әсіресе, жастарымыздың өсуіне зор мүмкіндік болар еді”, - деді өз сөзінде айтыскер ақын Марат Ахметов.

          Еркін кездесу форматында ұйымдастырылған басқосуда айтыскер ақындар облыс көлеміндегі өзекті мәселелер туралы да ойларын ортаға салды.

          Ералы Тоғжанов бүгінгі кездесуде қойылған сұрақтар мен көтерілген мәселелерге, ұсыныстарға қолдау білдіретінін сөз етті.

          Айтып өту керек, Ақтөбеде биыл қазан айында Есет батыр Көкіұлының 355 жылдығына арналған шаралар аясында еліміздің әр өңірінен келген ақындардың қатысуымен айтыс өтті. Қазір айтыстың насихаты, көрермені мол. Сонымен қоса, айтыс ақындарына шығармашылық жағдай жасалуда. Облыстық халық шығармашылығы орталығы  жанында жұмыс істеп тұрған «Жас ақындар» үйірмесі от ауызды, орақ тілді ақындарды тәрбиелеуде,  талай бәйгелерді жеңуде зор үлес қосып отыр.

• 18.12.2022
• 266