Астанада «ОТБАСЫ – ҰЛТ ТІРЕГІ!» атты VII Республикалық әкелер форумы өтті.

Ақпарат және қоғамдық даму министрі Дархан Қыдырәлі, Оқу-ағарту министрі Асхат Аймағамбетов, Парламент депутаттары мен ҚР Президентінің жанындағы Әйелдер істері және отбасылық-демографиялық саясат жөніндегі ұлттық комиссияның мүшелері қатысты.

Өз сөзінде Д.Қыдырәлі: "Биылғы форумның «Отбасы – Ұлт тірегі» деп аталуының өзіндік мән-маңызы бар. Себебі отбасы – игі дәстүрлер мен тағылым-өнегенің, ұрпақтар сабақтастығы мен тәрбиелік иниституттардың сақтаушысы.

Мемлекет басшысы Қасым-Жомарт Тоқаев: «Халқымыз қай заманда отбасы дәстүрін берік ұстанып, қадірлей білген. Әке-шешесінің, ата-әжесінің тәрбиесін көріп, үлкендерден тағылым алып өскен бала есейгенде отаншыл, білімпаз, еңбекқор азаматқа айналады», – дегені белгілі. Халқымыздың «Отан отбасынан басталады» деген нақыл сөзінің мәні де осында болса керек", - деді.

Сондай-ақ министр "Біз ата-аналардың, соның ішінде әкелердің рөлін социологияға сүйене отырып зерттейміз. Мәселен, «Қазақстан қоғамдық даму институтының» деректеріне сүйенсек, бүгінгі қоғамда әкелердің отбасындағы рөлі негізінен қаржылық және материалдық игіліктерге байланысты. Нақтырақ айтар болсақ, әкелер мынадай міндеттерді көбірек орындайды: 1) 50,4 пайызы отбасын материалдық жағынан қаматасыз етеді; 2) 21 пайызы отбасылық бюджетті басқарумен айналысады; 3) 9,6 пайыз әке балаларды үйірмелер мен спорт секцияларына апарады", - деп мәлімдеді.

Жиында орталық және жергілікті атқарушы органдардың, ғылыми-сараптамалық қоғамдастықтың, ҮЕҰ мен БАҚ өкілдері, сондай-ақ «Әкелер одағы» РҚБ делегаттары қатысып, ой-пікірлерін ортаға салды.

Сонымен бірге іс-шарада ұлттық құндылықтар және патриотизм, бұқаралық спорт, инклюзия, өмірлік маңызды дағдылар, отбасылық білім және демалыс, мектептер жанындағы әкелер кеңестері тақырыптары талқыланды.

Іс-шараның қорытындысы бойынша әкелер институтын дамыту және осы саладағы қордаланған мәселелерді шешу жөнінде ұсынымдар мен сарапшылар пікірлерінің жиынтығы әзірленіп, мүдделі мемлекеттік органдарға орындау үшін жолданатын болады.

• 19.12.2022
• 257