Ұлттық экономика вице-министрі Ілияс Өсеров Алматы қаласының тұрғындарымен кездесу өткізді

Алматы қаласына жұмыс сапары, Наурызбай ауданы.

Кездесу барысында Қарағайлы шағын ауданының тұрғындары жазғы кезеңде ауыз судың жетіспеушілігіне шағымданды. Олардың айтуынша, су тазарту станциясын осы жылдың басында пайдалануға беру жоспарланған болатын. Алайда нысан әлі іске қосылмады.

І.Өсеровтің сөзінше, құрылыс жұмыстарының кешігуіне әсер еткен себептердің бірі - Алматы облысы Қарасай ауданы әкімдігінің тұрақты пайдалану құқығын беретін мемлекеттік актіні тек 2022 жылдың мамыр айында берген. Қазіргі уақытта құрылыс жұмыстары жүргізілуде. Олардың аяқталу мерзімі – 2023 жылдың маусым айы. Ол жобаға барлығы 6,6 млрд. теңге бөлінді, оның ішінде 5,3 млрд. теңге игерілді.

Өз кезегінде "Абай саяжайлары" шағын ауданының тұрғындары сол жерде орналасқан үйлерді бұзу мәселесін көтерді. Вице-министр атап өткендей, Алматының шет аймақтарын дамытуға ерекше көңіл бөлінуде. Абай даңғылы мен Төле би көшесін тесіп өтуге бөлінген шекарада 343 объект тұр. Қазірдің өзінде 3,7 млрд. теңге сомасына 116 нысан сатып алынды, 756 млн. теңгеге 17 нысан сатып алынады, 27 үй бойынша мәселелер сот тәртібімен шешіледі, тағы 192 нысан бойынша шешім қабылданған жоқ.

Бұдан бөлек қала тұрғындары коммуналдық желілердің тозуына, көшелерді жарықтандыру мәселелеріне, пәтер иелері кооперативтері жұмысына шағымданды. Барлық мәселелер бойынша әкімдік нақты жұмыс жүргізетін болады.

Сонымен қатар, Ұлттық экономика вице-министрі азаматтарды жеке қабылдады. Алматы қаласы жергілікті өзін-өзі басқару комитетінің мүшесі осы орган қызметкерлерінің мәртебесін өзгерту және жалақысын көтеру мүмкіндігін қарастыруды сұрады. Жалақы бүгінгі күні шамамен 80 мың теңгені құрайды.

«Сіздің сұрағыңызға келетін болсақ, мұнда комитет туралы ереже әзірлеу қажет. Ережеде оның өкілдеріне мемлекеттік қызметші мәртебесін беру, сондай-ақ жалақыны көтеру туралы тармақтар көрсетілу керек. Кейін құжат қалалық мәслихаттың қарауына шығарылады», - деп жауап берді І.Өсеров.

Ақжар шағын ауданында сумен жабдықтау және су бұру жүйелерінің құрылысына келетін болсақ, Ұлттық экономика вице-министрі бүгінгі күні 19 км су құбыры мен 15 км кәріз құрылысы жүргізіліп жатқанын хабарлады. Сондай-ақ, Ақсай су тазарту станциясының құрылысы басталғанын атап өтті. Барлық жұмыстар аяқталғаннан кейін 2025 жылы Ақжар, Таужолы, Тастыбұлақ және Шұғыла шағын аудандарының 100 мың тұрғыны ауыз сумен қамтамасыз етіледі деп күтілуде. Жалпы 20,6 млрд. теңге бөлінді, оның ішінде 5 млрд. теңге ағымдағы жылы бөлінген.

Сондай-ақ, І.Өсеров Қарғалы мен Ақсай су тарту нысандарының құрылысына қаржыландыру толық көлемде бөлінгенін атап өтті. Жалпы, өңірлерді сумен қамтамасыз ету бойынша белсенді жұмыстар жүргізілуде.

Тұрғындар көтерген барлық мәселелер әкімдіктің бақылауына алынып, қажет болған жағдайда Үкімет тарапынан қолдау көрсету жөнінде ұсыныстар енгізілетін болады.

• 28.12.2022
• 173