Ақтөбе облысында мемлекеттік қызметтердің 98,5%-ы электронды форматта көрсетілген

Жыл басынан бері Ақтөбе облысында жергілікті атқарушы органдармен 9,3 миллионнан астам мемлекеттік қызмет көрсетілген. Оның 9,2 миллионы немесе 98,5%-ы – электронды форматта. 2021 жылы көрсеткіш 96%-ды құраған.

Бүгін облыстық әкімдікте облыстық басқармалар басшыларының, Ақтөбе қаласы және облыс аудандары әкімдері орынбасарларының, жауапты мамандардың қатысуымен кеңес өтіп, онда мемлекеттік қызмет көрсету бойынша жылдың алдын ала қорытындысы айтылды.

«Мемлекеттік қызметер көрсету – жауапты міндет. Өткен жылғы мемлекеттік органдар қызметінің тиімділігіне операциялық бағалау қорытындысымен облыс 93,24 балды иеленіп, 2020 жылдың бағалауымен салыстырғанда 52,88 балға артты. Аталған көрсеткіш жақсы деңгейде болғанымен әлі де жұмыстануымыз қажет, әлі де алдымызда бірқатар міндет тұр. Бұл орайда, мемлекеттік органдар қызметінің тиімділігін арттыру мен саланың дамуы әрқашан басты назарда болмақ», - деді облыс әкімі аппаратының басшысы Қайрат Райымқұлов.

Кеңес барысында электрондық форматта көрсетілетін мемлекеттік қызметтердің үлесін ұлғайту, сондай-ақ көрсетілетін қызметтердің сапасын одан әрі арттыруға 2023 жылы да басымдық берілетіні атап өтілді.

«Ағымдағы жылы бөліммен 160 ішкі бақылау іс-шаралары өткізілді. Бақылау іс-шараларының қорытындысы бойынша 581 ұсыныс беріліп, орындалу мерзіміне қарай 90% орындалды. Сондай-ақ, жергілікті атқарушы органдармен 1059 түсіндіру іс-шаралар өткізілді. Мемлекеттік көрсетілетін қызметтер бойынша 523 адам біліктілікті арттыру курстарынан өтті. Бұған қоса, бөліммен білім беру, денсаулық сақтау  және архив саласында мемлекеттік қызмет көрсету бойынша біліктілікті арттыру курстары өткізілді, онда 500-ге жуық адам сертификаттармен қамтылды», - деп облыс әкімі аппаратының мемлекеттік көрсетілетін қызметтер сапасын бақылау және мониторингілеу бөлімінің басшысы Альмира Шамирова есеп берді.

Жыл бойы мемлекеттік көрсетілетін қызметтер саласында өз жұмысын нәтижелі атқарып, мемлекеттік көрсетілетін қызметтер сапасын арттыруға өзіндік үлес қосқан бірқатар мемлекеттік қызметші облыс әкімінің Алғыс хатымен марапатталды.

• 28.12.2022
• 170