Ақтөбені абаттандыру мен санитарлық тазалау мәселелері күн тәртібінде қала бермек

Ақтөбе қаласын абаттандыру және санитарлық тазалау мәселелері облыс әкімі Ералы Тоғжановтың төрағалығымен өткен жиында қаралды.

Жиынға мемлекеттік органдардың басшылары, қаладағы аумақтардың санитарлық тазалығына жауапты мердігер ұйымдардың өкілдері қатысты.

«Бүгінгі таңда қала бойынша үлкен жұмыстар жасалды, алайда проблемалық учаскелер әлі де бар. Қаланы абаттандыру мен санитарлық тазалау мәселелері толықтай шешілмейінше, күн тәртібінен түспейді», - деп атап өтті Ералы Тоғжанов.

Еске салайық, бұған дейін облыс әкімі аталған компаниялардың мемлекеттік сатып алулар конкурсы кезінде мәлімдеген техникаларының саны мен жұмысшыларының бар-жоғын тексеруді тапсырған болатын. Тексеру осы аптада аяқталмақ.

«Бір апта бұрын қалада қар жауды. Басқаны былай қойғанда, сіздер сол аз мөлшерде жауған қарды тазарту жұмыстарын да жөнді атқара алмадыңыздар. Демек, сіздерде техника жоқ, немесе үнемдеп жүрсіз, немесе басқа схемамен жұмыс істейсіздер. Әрқайсысыңызға байланысты егжей-тегжейлі талдау жұмыстары жүргізіледі. Сіздерде тек бір ғана жол бар, ол – мемлекеттік сатып алуларға сәйкес жұмыс көлемін орындау. Басқа амал жоқ. Кім жалған деректер беріп, алаяқтыққа барып, міндеттемелерін орындамайды, солар жауапқа тартылады. Халық ақшасына жұмыс істеп отырып, халықты алдауға тырыспаңыздар», — деді Ералы Тоғжанов қала тазалығымен айналысатын мердігер мекеме өкілдеріне.

Жиын барысында өткен аптада өзендер, арықтар мен каналдардың арналарын тазарту бойынша басталған жұмыстар да қаралды.

Жалпы ұзындығы 14 шақырымға жуық Сазды, Жіңішке, Тамды және Бұтақ өзенінің арналары қураған бұталар мен шөптерден тазартылуы керек. Осы аптада Сазды өзенінің арнасын тазарту аяқталады. Сонымен қатар, қала аумағындағы 50 шақырымды құрайтын каналды, ашық және жабық типтегі суағарларды қоқыс пен арамшөптерден тазарту жұмыстары аяқталды.

Алдын алу шаралары көктемгі кезеңде еріген қар суының кедергісіз ағуын қамтамасыз етеді.

• 28.12.2022
• 168