Ақтөбе облысының алты елді мекенінде жаңа кәріздік тазарту қондырғысының құрылысы басталады

Өңір басшысы Ералы Тоғжановтың төрағалығымен өткен жиында Ақтөбе облысындағы кәріздік тазарту қондырғысының құрылыстарын салу және жаңғырту мәселелері қаралды.

Бүгінде облыстың 19 елді мекенінде орталықтандырылған кәріз жүйесі бар. 2013-2021 жылдар аралығында Қандыағаш, Жем, Алға және Ембі қалаларындағы биологиялық тазарту құрылыстарын қайта құру жобалары жүзеге асырылды.

Сондай-ақ, Хромтау, Шалқар қалаларында, Қобда, Қарауылкелді, Шұбарқұдық ауылдарында кәріздік тазарту қондырғысының құрылыстарын салу жобалары әзірленуде.

Ақтөбеде кәріздік тазарту қондырғысы құрылысының ең ірі жобасы Еуропалық қайта құру және даму банкінің қаржыландырылуымен жүзеге асырылады. Қазіргі уақытта техникалық-экономикалық негіздеме жасалуда. Сонымен қатар, облыс әкімдігі мен ЕҚДБ арасында өзара түсіністік туралы меморандумға қол қойылып, дайындық жұмыстары басталғаннан бастап құрылысты аяқталғанға дейінгі іс-шараларды көздейтін жобаны жүзеге асырудың Жол картасы әзірленіп, бекітілді.

Айта кету керек, бүгінгі таңда кәріздік тазарту қондырғыларының нашарлауы Елек өзенінің ластануына әкеп соғуда. Сондай-ақ Ақтөбеден жағымсыз иістің шығуының бірден-бір себебі де  осы — ескі тазарту қондырғылары.

Жаңа кәріздік тазарту қондырғысын салу қаладағы санитарлық-эпидемиологиялық жағдайға да оң әсерін тигізеді.

Облыс әкімі тиісті мемлекеттік органдарға жобаларды әзірлеуді жеделдетіп, ерекше бақылауда ұстауды және оларды жүзеге асыруға қатысты барлық мәселелерді тез арада шешуді тапсырды. Сондай-ақ Ералы Тоғжанов бірінші кезекте жөндеуді қажет ететін ең басым бағыттарды анықтауға мүмкіндік беретін кәріз желілерінің тәуекелдерін бағалау картасын жасауды тапсырды. Қазір Ақтөбе қаласының жылу жүйелеріне де осындай карта әзірленуде.

• 28.12.2022
• 194