Ералы Тоғжанов: Жастар саясатын дамыту — басым бағыттардың бірі

Облыстық ведомствоаралық комиссияның кезекті отырысында жастар арасындағы құқықбұзушылықтың алдын алу мәселелері қаралды.

Облыс әкімі Ералы Тоғжановтың төрағалығымен өткен жиынға аудан әкімдері, мемлекеттік органдардың, құқық қорғау және қадағалау органдарының басшылары қатысты.

Жастар мен жасөспірімдер арасындағы құқықбұзушылықтың алдын алу, қылмыстың өсуіне жол бермеу басты міндеттердің бірі болып қала бермек. Кешенді жоспар аясында биыл облыста жастардың құқықтық сауаттылығы мен мәдениетін арттыру мақсатында 200-ден астам іс-шара өткізілді. Құрамында дінтанушылар, психологтар, жастар ұйымының өкілдері бар жұмыс тобы жатақханада тұратын студенттермен үнемі кездесіп, құқықбұзушылықтың, діни экстремизм мен терроризмнің алдын алу мақсатында түсіндірме жұмыстарын жүргізіп, рейдтер жүргізіп тұрады.

Жыл басынан бері 21 мыңнан астам жас ақтөбелік жұмыспен қамту шараларымен қамтылды, 6100 жаңа жас кәсіпкер тіркелді, олардың 337-сі өз ісін ашу үшін 4,2 млрд теңгеге несие, 375 жас 470 млн теңгеге грант алған.

Облыс әкімі жастар ресурстық орталықтары, жастар жөніндегі кеңестер жұмысының нәтижелерін сынға алып, олардың қызметін күшейтуді тапсырды.

Сондай-ақ облыс әкімінің тапсырмасымен еңбек нарығына жан-жақты талдау жүргізілетін болады, нәтижесінде ЖОО мен колледждер сұранысқа ие мамандықтар бойынша мамандар даярлауды қолға алмақ.

«Жастар саясатын дамыту – сіз бен біздің жұмысымыздың басым бағыттарының бірі. Жастарға тиісті көңіл бөліп, оларды жұмыспен қамтамасыз етіп, кәсіпкерлікті дамытуға қолдау көрсетуіміз керек, әсіресе ауыл жастары оған мұқтаж. Барлық жағдай жасалған жерде қылмыс деңгейі төмен», - деп атап өтті өңір басшысы.

Жиын барысында облыстың сыбайлас жемқорлыққа қарсы тәуекел  картасына енгізілген қылмыстардың алдын алу мәселесі де қаралды.

• 04.01.2023
• 278