Алматыда «Туған жерге тағзым» атты өңірлік форум өтті

Өңірлік іс-шарада Алматы облысын дамыту мәселелері талқыланды. Форум жұмысына мүдделі министрліктердің, «Бәйтерек» ҰБХ, «Даму» кәсіпкерлікті дамыту қоры» АҚ, Алматы облысы әкімдігінің өкілдері, ғалымдар мен кәсіпкерлер қатысты.

Іс-шара спикерлері экономиканың түрлі салаларында өңірді дамытуға сеп болатын зор әлеует бар екенін атап өтті. Туризм, агроөнеркәсіп кешені, азық-түлік өндірісі, жеңіл өнеркәсіп, машина жасау, құрылыс индустриясы, фармацевтика және т. б. бағыттардың болашағы зор.

Жиында сөз алған «Даму» Қорының Басқарма төрайымы Гаухар Бурибаева бүгінгі күні Алматы облысы «Ұлттық жоба», «Қарапайым заттар экономикасы», «Даму-Өндіріс» мемлекеттік бағдарламаларын жүзеге асыруда Алматы облысы белсенді өңірлердің бірі екенін және кәсіпкерлердің белсенділігі бойынша көшбасшы екенін атап өтті. Бұл халықты жұмыспен қамту және кәсіпкерлікке тартуға айтарлықтай ықпал етеді.

«Жалпы, Алматы облысы бойынша кәсіпкерлікті қолдаудың мемлекеттік бағдарламалары аясында жалпы несие сомасы 644,5 млрд теңге болатын 15,4 мың жоба қолдау алды. Өңірде 1000-нан астам кәсіпорын бар, өңдеу өнеркәсібінің үлесі 85%-дан асады, республикадағы ең жоғары көрсеткіштердің бірі», - деп атап өтті төрайым.

Мемлекеттік қолдау шараларын жүзеге асыру әлеуметтік-экономикалық нәтижеге оң серпін береді. Мәселен, 2010-2021 жылдары Алматы облысындағы қолдау алған шағын және орта кәсіпкерлер 4,5 трлн теңгенің өнімін шығарды, оның ішінде 2021 жылы – 1,3 трлн теңгені құрады. 2010-2021 жылдары кәсіпорындардан түскен салық сомасы 283 млрд теңгені құрады, оның ішінде 2021 жылы – 78 млрд теңге болды. Осы кезеңде өңірде 8,6 мың жаңа жұмыс орны ашылды.

• 09.01.2023
• 354