Сенат Мемлекет басшысының жекелеген тапсырмаларын іске асыру мәселелері бойынша Заң жобасын мақұлдады

Астана. Парламент Сенатының пленарлық отырысы.

Ұлттық экономика министрі Ә.Қуантыров «ҚР кейбір заңнамалық актілеріне Мемлекет басшысының жекелеген тапсырмаларын іске асыру мәселелері бойынша өзгерістер мен толықтырулар енгізу туралы» Заң жобасын таныстырды.

«Мемлекеттік сатып алу туралы» Заң

Сыбайлас жемқорлық тәуекелдерін азайту және бәсекелестікті дамыту мақсатында бір көзден сатып алу құқығы алынып тасталады:

мемлекеттік материалдық резервке алынатын тауарлар

жедел-іздестіру қызметін жүзеге асыруға арналған тауарлар мен қызметтер

тұрғын емес мақсаттағы ғимараттар

«Заң жобасында «Самұрық-Қазына» қорының сатып алу қағидаларын Бәсекелестікті қорғау және дамыту агенттігімен келісу міндеттілігі, өнім берушілердің сатып алу тәсіліне қарамастан сатып алуға шағым жасау құқығы, Қордың холдингішілік кооперациясы шеңберінде сатып алу тәсілін алып тастау нормасы көзделеді», - деді ҰЭМ басшысы.

Бюджетаралық қатынастарды одан әрі реформалау

Мақсаты – өңірлердің қаржылық дербестігін күшейту

салық түсімдерінің кейбір түрлерін жергілікті деңгейге беру

бюджеттік бағдарламалар әкімшілерінің жауапкершілігі

көрсеткіштерге бюджеттік мониторингті қамтамасыз ету

«Мемлекеттік сатып алу рәсімдерін айналып өтуді болдырмау мақсатында мемлекеттік-жекешелік әріптестік жобаларының айрықша критерийін енгізу ұсынылады. Яғни ол жеке әріптестің объектіні құруы мен пайдалануы бойынша жобаның екі кезеңін міндетті түрде біріктіруін қамтиды. Артық маржиналдылықты төмендету үшін және мемлекет пен жеке сектор арасындағы тәуекелдердің теңгерімді бөлінуін қамтамасыз ету үшін инвестициялық шығындардың өтемақысын төлеу алып тасталады, бірлесіп қаржыландыру бойынша шектеу енгізу және квазимемлекеттік сектор субъектілерінің жеке әріптестер ретінде қатысуына кедергілер белгілеу ұсынылады», - деп хабарлады ведомство басшысы.

Сыбайлас жемқорлыққа қарсы бақылауды күшейту шеңберінде мемлекеттік-жекешелік әріптестік жобаларын жоспарлау және іске асыру процесінің ашықтығы мен айқындығы қағидатын енгізу көзделеді. МЖӘ жобаларын іске асыру кезінде монополияландыруды болдырмау мақсатында оларды Монополияға қарсы органмен міндетті түрде келісу қарастырылған.

«Табиғи монополиялар туралы» Заң

реттеліп көрсетілетін қызметтерді ұсыну кезінде технологиялық циклде пайдаланылатын желілер мен мүліктерді теңгерімге және сенімгерлік басқаруға алған жағдайда тарифтің қолданылу мерзімі өткенге дейін оны өзгерту мүмкіндігі қарастырылған

цифрландыру арқылы тариф белгілеу процесінің ашықтығын арттыру

«Ұлттық әл-ауқат қоры туралы» Заңға толықтыру

Үкіметтің шешімі бойынша «Самұрық-Қазына» қоры жыл сайын «Қазақстан халқына» қоғамдық қорына өзінің таза табысының кемінде 7%-ын аударатын болады

«Бұдан басқа заң жобасында арнайы экономикалық және индустриялық аймақтар туралы заңнаманы жетілдіру, жалдау төлемдерін субсидиялау тетігі бойынша ашылған шоттарды қорғау, шетелдік автомобильдерді алып келу мен пайдаланудың жекелеген мәселелерін реттеу, құрылысқа арналған жобаларға ведомстводан тыс кешенді сараптама жүргізу және басқа да мәселелер қарастырылған», - деп түйіндеді Ә.Қуантыров.

• 10.01.2023
• 459