Нұрлан Ноғаев Мұнайлы және Қарақия аудандарын сумен қамту мәселелері бойынша кеңес өткізді

Бүгін, 25 қаңтарда өңір басшысы Нұрлан Ноғаевтың қатысуымен Мұнайлы және Қарақия аудандарының тұрғындарын ауыз сумен үздіксіз қамтамасыз ету мәселелері жөнінде кеңес өтті, - деп хабарлайды Маңғыстау облысы әкімінің баспасөз қызметі.

Кездесу барысында облыс әкімі Қарақия және Мұнайлы аудандары әкімдіктерінің халықты ауыз сумен қамтамасыз етуі қажетті деңгейде емес екенін айтты.

«Каспий» су тұшыту зауыты» ЖШС жазғы кезеңде жалпы қуаты тәулігіне 25 000 м3 ауыз су өндіреді. Оның ішінде тәулігіне 12200 м3 ауыз су Мұнайлы, Қарақия және Түпқараған аудандарының тұрғындарына беріледі. Алайда, Мұнайлы және Қарақия аудандарын ауыз сумен қамту деңгейі төмендетіп отыр. Бұған суды тазарту және тұшыту цехтарындағы сүзгілердің тұнба және құммен қатты бітеліп қалуы себеп болып отыр.

Қазіргі таңда зауыттан Қарақия ауданына тәулігіне 1100 м3 көлемінде ауыз су жеткізілсе, оның тәулігіне 700 м3  қабылдануда. Мұнайлы ауданына тәулігіне 5600 м3 ауыз су беріледі, ал оның тәулігіне 3300 м3 алынады.

Яғни, сумен жабдықтау желілерінде су шығыны бар. Осыған орай, аталған мәселені анықтап, жою үшін жұмыс тобы құрылды.

Өз кезегінде аймақ басшысы Нұрлан Ноғаев жауапты тұлғаларға бірқатар нақты тапсырма берді.

 - Қазіргі таңда кейбір тұрғындарға су көлікпен жеткізеді. Бұлай мәселе шешілмейді. Өздеріңізді сусыз қалған тұрғындардың орнына қойып көріңіздер. Не істер едіңіздер?  Бұл су жеке тұтынуға да, тұрмыстық қажеттіліктерге де жетпейді. Осыған байланысты тұрғын үй-коммуналдық шаруашылық бөліміне, «Каспий тұщыту зауытына», «МАЭК» ЖШС-не, сондай-ақ Мұнайлы және Қарақия аудандарының әкімдеріне бұл мәселені бірлесе отырып, жұмыс тобының құрамымен тез арада шешуді тапсырамын, - деді Нұрлан Ноғаев.

• 27.01.2023
• 181