Биыл маңғыстаулық кәсіпкерлерге бірнеше бағытта мемлекеттік қолдау көрсетіледі

2021-2025 жылдарға арналған кәсіпкерлікті дамыту жөніндегі ұлттық жоба шеңберінде биыл бірнеше бағытта қолдау көрсетілмек. Бұл туралы Қоғамдық коммуникация орталығында өткен брифингте Маңғыстау облыстық кәсіпкерлік және сауда басқармасы басшысының орынбасары Пікір Сансызбаев хабарлады.

Спикердің айтуынша, бірінші бағыт портфельдік субсидиялау және ішінара кепілдік беру. Бұл бағыт бойынша инвестициялық мақсатта 20 миллион тг дейін несие алған кәсіпкерлерді субсидиялау 3 жылға дейін жалғасады. Ал, айналым қаражатын толықтыруға 5 млн теңгеге дейін субсидиялау 2 жыл болмақ.

Қала кәсіпкерлерінің несие сыйақы мөлшерлемесі 6 пайыздан, ал моно және шағынқалаларда, елді мекендегі несиенің сыйақысы 5 пайыздан аспайды. Қала кәсіпкерлеріне бірқатар салалық шектеулер қойылса, ауылдық елді мекеннің кәсіпкерлеріне мұндай шектеулер жоқ.

Маманның айтуынша, екінші бағыт - кәсіпкер өз жобаларын ұсынып, 3 миллиард тг дейін, ал моно және шағынқала, ауылдық елді мекендерде 1,5  миллиард тг дейін несие алған жағдайда субсидияға қатыса алады.

-Кәсіпкерлерді немесе индустриялық-инновациялық қызмет субъектілерін қолдау бойынша  ішінара кепілдендірудің де өз шарттары бар. Егер ісін жаңа бастаған кәсіпкер 360 млн теңгеге дейінгі несие сомасымен жобаны іске асырса 85 пайызға дейін кепілдік беріледі. Ал, кәсіпкердің несие сомасы 1 млрд теңгеден аспаған жағдайда 50 пайызға дейін кепілдік беріледі,- деді Пікір Сансызбаев.

Брифинг барысында, спикер 2023 жылдың 1 қаңтарындағы жағдай бойынша 46 390,7 млн.теңге несие сомасына, 274 жаңа жұмыс орнын құрумен 3 102 жоба қолдау алып, 520 жұмыс орны сақталғанын айтты. Мемлекеттік қолдауға ие болған кәсіпкердің бірі - «Kaspi Keruen» компаниясының директоры Гаухар Әбілда. 

-Қазіргі таңда мекемеміз дәмдеуіштерді шығарумен айналысады. Компанияның үздіксіз жұмыс істеп келе жатқанына 5 жыл болды. Субсидияны жұмыс барысына қажетті құралдарды сатып алу үшін  6%-бен 3 жыл мерзімге дейін алдық. Яғни, субсидия арқылы 4 құрылғыны сатып алғаннан кейін, дәмдеуіштің сыртын қаптау жұмыстары жеңілдетілді. Бұл арқылы бір күнде шығаратын дәмдеуіштердің саны артып, кәсібімнің дөңгеленуін үдете түсті,- дейді Гаухар Әбілда.

Айта кетейік, мемлекеттік қолдаулар туралы толық ақпаратты кәсіпкерлік және сауда басқармасының ресми парақшаларынан,  «Даму» кәсіпкерлікті дамыту қоры мен «Даму» кәсіпкерлікті дамыту қорының 1408 call орталығы және барлық екінші деңгейлі банктерден ала аласыз. 

Сондай-ақ, әлеуметтік желіде
@mangystau.business, funddamu инстаграм парақшаларынан күнделікті жаңа ақпараттармен таныса аласыз.

• 02.02.2023
• 210