Қасым-Жомарт Тоқаев Қарағанды облысында тұратын 73 жастағы спортшыны атап өтті

Аймағымызға белгілі спорт ардагері Дәрібай Оспановпен кездесіп, оған еліміздің Президенті Қасым-Жомарт Тоқаевтың атынан алғыс хат, сағат пен Бурабайдағы демалыс үйіне жолдаманы тапсырдым.

Ағадыр кентінің тұрғыны 73 жастағы Дәрібай Оспанов - ардагерлер арасында штанганы көтеру бойынша абсолютті Әлем чемпионы, Қазақстанның бірнеше дүркін чемпионы, пауэрлифтингтен Азия мен Әлемнің екі дүркін чемпионы және спортқа еңбек сіңірген жаттықтырушы.

Ол күн сайын жаттығу жасап, жүгіреді. Салмағы 83 кг болса да, 200 кг штанганы көтереді!

Дәрібай ағаның барлық ұлдары - спорт шеберлері, чемпиондар. Олар әкесімен бірге Ағадырда балаларды жаттықтырумен айналысады.

Ағадыр кентінен шыққан Оспановтар отбасы халықаралық аренада елімізге 30-дан астам жеңіс әкелді. Биыл спортшылар Үндістан мен Моңғолиядағы әлем біріншіліктеріне қатысуды жоспарлап отыр. Осы орайда спортшылардың тиімді жаттығуы үшін оларға жаңа спорттық жабдықты алуға сертификат бердік.

Өз тарапымнан Дәрібай Қараманұлына еңбек сіңірген спорт шебері атағын алуын, жаңа жеңістерге жетуін және мықты денсаулық тілеймін!

• 02.02.2023
• 319