Ерекше балалардың ата-аналарымен кездестім

Мұндай кездесулер түйіткілді мәселелерді анықтап, оларды жылдам шешуге мүмкіндік береді. Мұны ата-аналар мен қоғам белсенділері кездесуде атап өтті.

Бүгінде облыста бес психологиялық-медициналық-педагогикалық консультация, екі оңалту орталығы және сегіз психологиялық-педагогикалық түзету кабинеті жұмыс істейді. 2025 жылға дейін аудандарда түзету кабинеттері мен тағы бір ПМПК-ны кезең-кезеңімен ашамыз. Сондай-ақ екі балаларды оңалту орталығы ашылады.

Арнайы мектептердің материалдық-техникалық базасын нығайтуды және білім беру, спорт объектілерін бейімдеуді жалғастырамыз. Бүгінгі күнге дейін 25 нысан бейімдеуден өтті. Бұл бағыттағы жұмыс жалғаса береді. Аймақта білікті дәрігерлерге, педагогтар мен жаттықтырушыларға деген қажеттілік әлі де бар. Бұл орайда мамандарды қайта даярлау және қайта оқыту мүмкіндігі талқыланды.

Қосымша білім беру бойынша. Биыл өңірде жан басына шаққандағы шығармашылық тапсырысты қаржыландыруға бюджеттен 1 миллиард 127 миллион теңге бөлінді. Қазірдің өзінде балалар жүзу, кескіндеме, сурет салу және мүсіндеумен айналысатын бейімделген үйірмелер баршылық. Олардың санын әлі де көбейту керек.

Келесі тоқсан сайынғы кездесуге дейін ерекше балалардың жазғы демалысы және бос уақыттарын өткізудің жоспарын әзірлеуді, сондай-ақ тірек-қимыл аппараты бұзылған пациенттерге үй жағдайында қызмет көрсету мәселесін шешуді тапсырдым.

• 02.02.2023
• 246