Yessenov Universitу-де Ордалы Қосайдың құрметіне оқу аудитория ашылды

8 ақпанда Yessenov Universitу-де облыс әкімі Нұрлан Ноғаевтың қатысуымен ардагер ұстаз Ордалы Қосайдың құрметіне жасақталған «Биіктік» оқу аудиториясы ашылды, - деп хабарлайды Маңғыстау облысы әкімінің баспасөз қызметі.

Салтанатты шарада облыс әкімі Нұрлан Ноғаев жоғары оқу орнының оқытушылары мен ардагер ұстаздарын құттықтап, білім беру саласында атқарып жатқан жұмыстарына сәттілік тіледі.

- Қоғамдағы барлық саланың жетістігі математика ғылымымен байланысты. Қазіргі таңда математиканы тереңдетіп оқу, жаңашылдықтар мен әлем жетістіктерін негізге алып, білім беру өте маңызды. Сондықтан оқу ордасы жасақтаған жаңа аудиторияның орны ерекше. Мұнда тек өңірдің ғана емес, ел экономикасының дамуына ықпал ететін түлектер білім алуда, - деді Нұрлан Ноғаев.

Ордалы Қосай - қоғам қайраткері, «Маңғыстау» энциклопедиясы авторларының бірі, елдегі қоғамдық формация реформаларының бастамашысы. Ол өз сөзінде Маңғыстаудағы математика пәнінің оқытылуы мен игерілуін биікке шығаруды мақсат еткенін атап өтті.

- Осы уақытқа дейінгі еңбек жолымызды Маңғыстауда математика ғылымының дамуына арнадық. Ендігі кезекте жастардың математикаға деген қызығушылығы мен сүйіспеншілігін арттырып, өңірдегі жоғары оқу орнынан тереңдетілген білім алуын қалаймын. Осы орайда белгілі маңғыстаулық математиктердің тәжірибесі мен ғылыми әдістерін зерттеп, арнайы аудитория ашып отырмыз, - деді ардагер ұстаз Ордалы Қосай.

• 08.02.2023
• 182