«Маңғыстау – мүмкіндіктер мекені»: Жастарды дамыту тұжырымдамасы әзірленді

21 ақпанда Маңғыстау облысының әкімі Нұрлан Ноғаев жұмыс сапарымен Қарақия ауданындағы Құрық кентіне барып, «Аксон мед» оңалту орталығы мен жастар ресурстық орталығының жұмысымен танысты, - деп хабарлады Маңғыстау облысының әкімінің баспасөз қызметі.

Қарақия облыстық жастар ресурстық орталығы 1975 жылы салынған ғимаратта отыр. Онда жастарға жағдай жасалмаған.

Облыс әкімімен кездесуде Қарақия жастар ресурстық орталығының директоры Әлібек Оразбек ескі ғимаратты жөндеуден өткізіп, жастар орталығының балансына беруді ұсынды. Сонымен қатар Жетібай ауылында жастар орталығын ашу қажеттігін айтты.

Аймақ басшысы Нұрлан Ноғаев күрделі жөндеу жұмыстарын ұйымдастыруды тапсырды.

– Барлық аудандағы жастар орталықтарының жеке ғимараты болуы керек. Мұндай алаңдар жастарға қызықты болуы керек, сонда ғана олар пікір алмасып, жаңа білім алып, идеялар мен жобаларды іске асыра алады. Бұл мемлекеттік жастар саясатын жүзеге асыруда өте маңызды рөл атқарады. Осыны негізге ала отырып, Қарақия ауданындағы жастар орталығына күрделі жөндеу жұмыстарын жүргізуді тапсырамын. Жауапты басқарма басшылары жобалық-сметалық құжаттаманы дайындауы қажет, - деді Нұрлан Ноғаев.

Былтыр жастардың бастамаларын қолдауға 125 миллион теңге бөлінді.

Ал 2023 жылға 270 миллион теңге қарастырылып, өңірдегі мемлекеттік жастар саясатын дамытуға бағытталған «Маңғыстау – мүмкіндіктер мекені» тұжырымдамасы әзірленді. Соның аясында маңғыстаулық жастарға арналған жобалар мен бағдарламалар қаржыландырылып, әлеуметтік-кәсіпкерлік мақсатта қайтарымсыз гранттар беріледі. Сонымен қатар отандық және шетелдік тағылымдамадан өту және тұрғын үймен қамтамасыз ету, жұмыссыздықтың алдын алу, жас көшбасшыларды даярлау бойынша жоспар бекітілді.

Нұрлан Ноғаев жастармен кездесуден соң 2021 жылы ашылған «Аксон Мед» оңалту орталығының қызметімен танысты. Мұнда күрделі операциялардан кейін және жүйке жүйесі, бел омыртқасы аурулары, тірек-қимыл аппараты бұзылған науқастар келіп, тегін оңалту қызметін ала алады. Орталықта магниттік терапия кабинеттері, тұз шахтасы, массаж және т.б. ем шаралары жүргізіледі. Жалпы оңалту орталығының 150-200 шақты науқасты қабылдауға мүмкіндігі бар. Қазір 50 адам ем қабылдап жатыр.

• 24.02.2023
• 195