Щучинск қаласында биатлоннан әлем чемпионатының ашылу салтанаты өтті

4-12 наурыз аралығында Бурабай ауданы Щучинск қаласының Ұлттық шаңғы орталығының базасында ел тарихында тұңғыш рет жасөспірімдер арасында биатлоннан әлем чемпионаты өтуде, оның шеңберінде әлемнің ең мықты жас биатлоншылары бес түр бойынша 18 сайыста жарысады. Стартқа 40 елден 500-ге жуық қатысушы шығады.
Ақмола облысынан жеті спортшы қатысады. Турнирге қатысушылар мен ұйымдастырушыларға ел Президенті Қасым-Жомарт Кемелұлы Тоқаев сәттілік тіледі.                                                                        

«Сіздерді биатлоннан жастар мен жасөспірімдер арасындағы әлем чемпионатының ашылуымен құттықтаймын! Қазақстан бұқаралық спортты дамытуға айрықша мән береді. Көптеген спорт нысаны салынып, балаларға арналған үйірмелер ашылып, жас ұрпақтың жан-жақты болып өсуіне барлық мүмкіндік жасалып жатыр. Щучинск қаласында осындай ауқымды іс-шараны ұйымдастыруға қолдау көрсеткені үшін Халықаралық биатлоншылар одағының өкілдеріне ризашылығымды білдіремін. Әлем біріншілігінің біздің елде өткізілуі Қазақстанда биатлонды дамытуға тың серпін береді деп сенемін», - делінген Мемлекет басшысының құттықтау хатында.

Салтанатты рәсім қысқы спорт түрлері бойынша олимпиадалық даярлау орталығының шаңғы-биатлон стадионында өтті. Жас биатлоншыларды халықаралық биатлоншылар Одағының (IBU) Президенті Олле Далин, ҚР Мәдениет және спорт министрі Асхат Оралов, ҚР Мәдениет және спорт вице-министрі Сарсен Құрамбек, Ақмола облысының әкімі Ермек Маржықпаев, Қазақстан биатлоншылар Одағының президенті Ермек Қизатов құттықтады.

Ермек Маржықпаев өзінің құттықтау сөзінде барлық қатысушыларды ауқымды іс-шараның ашылуымен құттықтап, спорт саласына ерекше мән берілетінін атап өтті.

"Біздің елімізде кәсіби және бұқаралық спортпен шұғылдануға барлық жағдай жасалған.
Ірі халықаралық жарыстардың көптеген чемпиондары мен жүлдегерлері тәрбиеленді, көптеген жаңа спорт кешендері салынды және ашылды. Бүгінгі таңда осы сөздерді растау үшін біздің облыс биатлоннан жасөспірімдер арасындағы Әлем чемпионатын қабылдайды, оған ең мықты спортшылар қатысады. Біз қонақтарымызды, спортшыларымызды, мамандарымызды, жанкүйерлерімізді осында үйде сезіну үшін бәрін жасаймыз. Біз әлемге өз елімізді де, жүрегімізді де аштық. Қазақстанға қош келдіңіз!" - деп атап өтті аймақ басшысы. 

Айта кетейік, спорт нысаны ашылған сәттен бастап көптеген спорттық-бұқаралық іс-шаралар өткізілді. Бұл экстремалды рейс Ұлттық Бурабай жарысы, шаңғы жарысы бойынша Шығыс Еуропа континентальды Кубогы (FIS),ерлер арасындағы шаңғымен шаңғымен сырғанау бойынша FIS Гран-При Әлем Кубогының жазғы кезеңі және т.б.

• 06.03.2023
• 208